No.6970/2020-2021

Vawiin khan Forest Minister Pu TJ Lalnuntluanga chuan PCCF Conference Hall, Tuikhuahtlang-ah 'Mizorama Nungcha Humhalhna Hmun Bikte Chanchin' tih Pu K. Lalmuansanga, ASEP President ziah chu a tlangzarh. He lehkhabu-ah hian Mizoram chhunga National Park pahnih, Tiger Reserve pakhat leh Wildlife Sanctuary pariat kan neihte a chuang a ni.

Tlangzarh inkhawm hi ASEP General Secretary Pu B. Lalhminghlua chuan a kaihruai a. Minister bakah Principal Secretary & PCCF Pu Liandawla, IFS-in thu a sawi a; a bu ziaktu Pu K. Lalmuansanga'n lehkhabu buatsaih dan chungchang a sawi bawk.

Tlangzarhtu Forest Minister Pu TJ Lalnuntluanga chuan a hmasa ber atana Mizorama nungcha humhalhna hmunṭe a hlawma bu khata chhiar theih tura buatsaih a ni chu lawmawm a tih thu a sawi a. He lehkhabu hi Mizoram tan mellung pawimawh tak leh nungcha humhalhna kawngah hmanraw ṭangkai tak a nih a beisei thu a sawi bawk a ni.

He hunah hian Forest Official pawimawh ṭhenkhat leh ASEP member-te an tel a, lehkhabu hi Rs. 200/- man a ni.