Fisheries leh Sericulture Department, Kolasib hnuaia hmalakna te vawiin khan Pu B.D Chakma, Minister Fisheries, Sericulture chuan tlawhin hmalak zel dan tur Department hnathawk te a sawipui.

Minister hian Sericulture Department hnuaia Muga Seed Farm, Kawnpui, Eri Seed Farm leh Mulberry Seed Farm, Kolasib te tlawhin, District Sericulture Office-ah Department staff te an hmachhawp hrang hrang te a sawipui a. Central Silk Board hmalakna hnuaia Muga Project thar nei tura hmalak mek ah Kolasib chu main target a nih tur thu leh Project centre a ruat a nih tur thu chungchang sawiho a ni a. Mizoram chu Special Seed Zone-ah puan niin, hemi project hnuaiah hian chhungkaw 500 chhawmdawl an nih tur thu leh Sericulture Farm hrang hrang te changtlung zawka thuam zel a nih dan tur te sawiho a ni.

Minister hian Fisheries Department hmalakna leh office building sak mek te pawh a hmunah tlawhin, thawktute kawmna hun a nei bawk a. Minister hian Sangha chaw siamna khawl Feed Mill Plant, Khuangpuilam leh Cold Storage a tlawh nghal a ni. Feed Mill Plant hi hawn a la ni lo a, Company Engineer te nen enho tura ruahman a la ni.