Vawiin chawhnu dar 1 khan DC Conference Hall Serchhipah World No Tobacco Day 2016 hman a ni a, District Bawrhsap Dr. Lalrozama, IAS chuan khuallian niin a hmapui.

Khuallian Dr. Lalrozama chuan Vaihlo leh a kaihhnawih do kawngah rilru thar nena hma kan lak chuan kawngro a su ang tiin he huna kalkhawm te chu tangho thiam turin a chaha, tanrualna hian rah tha a chhuah ngei a beisei thu a sawi. Hriselna atana vaihlo leh a kaihhnawh that loh zia inhrilhhriatna chu naupang lamah hmalak a pawimawh thu a sawi a, zuk leh hmuam leh thil thalo laka fihlim tura tanpuina an mamawh hle a ni a ti. Khuallian chuan vaihlo leh a kaihhnawih kan tih thin hian kan hriselna a tih chhiat bakah sum leh pai dinhmunah nghawng tha lo nasa taka a neih thu sawiin hemi tih reh tur hian theih tawp chhuah a tul hle a ni a ti bawk.

Kumin World No Tobacco Day-ah hian thupuiah, ‘Vaihlo tuam dan leh nghawng a neih te’ tih hmangin Dr. Zohmingsanga, District Consultant, NTCP, Serchhip District-in a sawi a, Pu Lalsangzuala. Inspector, Legal Metrology, Serchhip District chuan vaihlo leh a kaihhnawih chi hrang hrang te dan phal loh a zawrh a nih theih dan leh a hremna chi hrang hrang awm thei te a sawi thung a, Pi Sarah Laldintluangi, Food Safety Officer, Serchhip District chuan Gutkha chungchang a sawi bawk.

Serchhip-a World No Tobacco Day hmanna hi Dr. Laldawngliana Sailo, CMO, Serchhip, Serchhip District Anti Tobacco Squad Member Secretary ni bawkin a kaihruai a, Serchhip District Anti Tobacco Squad member te bakah NTCP-a thawktu te, Khawltlang hruaitu leh tlawmngai pawl hruaitu te bakah MJA member te an tel a ni.