3969/2022-2023
Khawzawl, the 24th March, 2023: Vawiin chawhma dar 11 khan Fisheries Minister Pu K.Lalrinliana chuan Khawzawl Darngawn Veng DC Office Complex-ah District Fisheries Development Officer (DFDO) Office a hawng.

Hemi pual inkhawm tawi Khawzawl DC Conference Hall-a hmanah Fisheries Minister Pu K.Lalrinliana chuan Fisheries Department chu Department lian lo tak leh hna pawimawh tak thawk a nih thu sawiin, Khawzawl District-a mumal leh changtlung zawka Department hnathawh theihna tura pawimawh hmasa DFDO Office, Khawzawl District hawn a ni leh thawktu turte dahfel a ni ta chu lawmawm a tih thu a sawi a. Thawktu indaihlohna leh hmanraw changtlung tawk lo chunga Fisheries Department hnuaia thawktute inpeknain rah tha tak a chhuah thin chu fakawm a ti a. Ei leh bara intodelh thei tur leh kan ram thar chhuahte tam zawk hralh chhuah a nih theih nan tanlak nasat angaih thu sawiin, lui dung nungcha inthlahpung chak takte chu ei leh bara intodelh theihna tura awlsam leh rang thei ber turte zinga mi a ni a; tiduhdah leh suasam mai lovin a humhalhna lam kan buaipui a ngai a ni, a ti a. Lui dung nungchate humhalh kawnga khaw hrang hrangah harhtharna a thleng mek leh, Department leh YMA inkara thawhhona tha tak a awm chu lawmawm a tih thu a sawi a. Kan zavaiin Fisheries Department thlawptu leh lui dung nungcha humhalhtute kan ni thei a ni, a ti bawk.

Pu K.Lalrinliana chuan sangha leh lui dunga nungcha awmte tihpun leh humhalh kawngah inzirtirna tam zawk neih zel tum a nih thu sawiin, a man dan leh man hunte bakah an inthlahpun dante chena hriat tlan a pawimawh a, sangha inthlahpun kawnga harsatna siam thei lui dung nungcha dangte leh sangha zinga harsatna thlen theite chena ven a pawimawh a ni, a ti a. Sangha khawi chi mai bakah kan ram lui dunga awm sangha tui tak takte leh lui dung nungcha dangte khawipun kawngah Department-in tan a lak mek zel thu a sawi bawk a. State pawn atanga chawlut lova kan intodelh theih nan ngaihtuahna senga taimak chhuah a tul thu pawh sawiin, sangha chu sa hrisel, mitin tana him leh chaw tha tak a nih avangin thar tam deuh deuh turin sangha dil mai nilo, buh nena dah pawlh paddy-cum-fish culture-te pawh uar deuh deuh a pawimawh thu a sawi a. Sangha no intodelh thei turin hatchery-te tha taka chhawr tangkai a pawimawh thu leh eizawnna atana tlak leh hlawk tak a nih thu a sawi a. DFDO Office Khawzawl District hawn thar leh thawktu fel tak tak dah chuan rah tha a chhuah ngei a beisei thu a sawi bawk.

He hun kaihruaitu Pu Laldawngliana, MPS, Secretary, Fisheries Department chuan dan tlawhchhanin lui dunga nungchate khauh taka humhalh thin an nih thu sawiin, lui leh a chhunga chengte tha taka humhalh chu khua leh tuite mawhphurhna a ni, a ti a. Sangha khawi leh man kawnga awmze nei zawka hmalak leh, a hlawknate a khawitu leh humhalhtuten an tel theih nana hmalak tum a nih thu a sawi bawk a. Sangha khawitu fish farmer-te chu tang deuh deuh turin a chah a. District Administration, Police, YMA leh mipuite chu lui dung nungchate humhalh kawngah tangruala dan bawhchhiate chunga hremna lekkawh zel turin a chah a. Dan bawhchhia man chhuah kawnga thuneitute puitu leh lui dung nungcha humhalh kawnga thawk thate hnenah lawmman pek thin a nih thu a sawi bawk a. Lui, dil leh tuihnate humhalha, a hausakna kaltlanga sum leh pai dinhmun siamthat hna, blue economy chu nakin zel atana pawimawh a nih thu a sawi bawk.

Thusawitu dang District Bawrhsap Pu C.C. Lalchhuangkima chuan DFDO Office thar hawn chu District tana mellung pawimawh tak a nih thu sawiin, Minister, Sawrkar leh Department-te chungah District Administration leh mipuite aiawhin lawmthu a sawi a. District tharah Department hrang hrangte an inbun chhoh mek zel thu a sawi bawk a. Khawzawl District chu sangha tam zawk thar chhuak thei tura theihna leh chakna nasa tak nei a nih thu pawh sawiin, thawktute chu harsatnate a hnena thlen hreh lo turin a chah a; sanghaa intodelh district ni thei tura hmalakpuiah a sawm nghal bawk.

He hunah hian Fisheries Department Director Pu F.Vanlallawma hnen atangin report ngaihthlak a ni a. Pu Lalhmunsanga, DFDO Champhaiin lawmthu sawiin hun hman hi a khar a ni.

DFDO Office Khawzawl hi DC Office Complex-ah Sawrkar In luahin an awm lailawk phawt dawn a. Thawktu 4, DFDO Pu Zohmingthanga bakah FD, LDC leh Fourth Grade pakhat theuhte awmin bul an tan a ni.

Food, Civil Supplies & Consumer Affairs (FCS&CA), Local Administration leh Fisheries Department changtu Minister Pu K.Lalrinliana chuan tukin khan Khawzawl khawpui chhunga a a enkawl Department hrang hrangte hmunhma leh hnathawhte tlawhin a enfiah a. Heng zingah hian Hermon venga DCSO Office & quarters bakah Legal & Metrology Working Standard Laboratory-te, Kawnzar venga Supply Godown leh Inspector Qtrs. te, Darngawn venga DLAO Office hmunhma bakah DFDO Office hmun nghet dinna turte pawh tlawhin a enfiah nghal bawk.