3968/2022-2023

Mamit 24th March, 2023 : Vawiin khan Govt. Mamit College Hall-ah World TB Day, 2023 hman a ni a. Dr. Zothankhuma Chhakchhuak, CMO Mamit chuan khuallian niin he hun hi a hmanpui.

Khuallian chuan World TB Day hmang tura kalkhawmte chibai bukin Human Development Index-ah hriselna chu thil pawimawh tak a ni a. Natna inkaichhawn theih chi hrang hrangin min tibuai em em a, chung zinga pakhat TB natna phei chu natna rei tawh tak niin mi tam takin an thihpui tawh a ni a ti. India ram chu TB vei tamna ram kan ni a. TB vei za zela 40 chu taksa chak loh vang a ni a, chuvangin mahni taksa hriselna vawng tha a, kumin TB Day thupui hrereng turin kalkhawmte a chah.

Khuallian chuan tunhma chuan TB veite chu hmun thengthaw nuamah khaw pawnah te an awmtir thin a, tunah chuan mahni inchhungkhurah ngei damdawi nen inenkawl theih a nih tawh thu a sawi. Mamit District chuan TB-a hmasawn tumin hma a la mek zel a. TB Ambassador nih tum vek tur leh Health Education midang zirtirtu ni theuh turin kalkhawmte a chah a ni.

Pu Vansangliana, Senior Treatment Supervisor chuan report pein nikum 2022 chhung khan Mamit District chhungah TB natna vei mi 49 awmin enkawl dam tawh hi mi 47 niin 96% a ni. TB avanga thi mi pakhat awmin pakhat damdawi la ei zawm ngai a ni bawk. Kumin 2023 bikah TB vei enkawl tawh mi 14 awm mekin heng zinga 2 hi TB leh HIV nei kawp an ni.

He hunah hian Pu VL Hmangaihkima, STLS kaihhruainain MITRA Campaign neih a nih bakah Pu Hmingchungnunga, DPS chuan TB Awareness a nei a. TB natna lanchhuah dan hrang hrangah zirtirna pein zawhna leh chhanna hun hman nghal a ni a. Piramal Foundation lamin Pledge sawi rualtirna leh Signature Campaign an nei bawk a ni.

Kumin World TB Day thupui hi Yes! We Can End TB tih niin Lalmuanpuii, TB vei enkawl dam tawh chuan thu a sawi bawk a ni.

He hun hi Dr. Lalnuntluangi Khiangte, DTO chuan kaihruaiin Dr. Lalrinfela H. MD, MO-TC chuan lawmthu sawina a nei a. He hunah hian Medical lama thawktute, khawtlang hruaitu leh tlawmngai pawl aiawhte, College zirlaite leh thutharthehdarhtute an tel a ni.