Vawiin khan Mizoram Fisheries Technical Service Association (MFTSA) chuan Fisheries Directorate Conference Hall, New Secretariat Complex-ah General Conference an hmang a. Fisheries Minister Dr.B.D.Chakma chu khuallian niin Fisheries Secretary Pu Thlamuana chu khualzahawm a ni.
Fisheries Minister Dr.B.D.Chakma chuan hlawhtling turin inlungrualna, taimakna leh thawhhona tha a pawimawh tiin famkim tumah kan awm lova, Mizoram tana department hmalakna a hlawhtlin theihnan thawktu a te ber atanga a lian ber thlengin an pawimawh a ni, a ti. Minister chuan sangha chi supply chungchanga chanchin lawmawm loh hriattur a awm fo chu a reh theih nan a chhan bulpui zawn chhuaha chinfel tul a ti a. Department lamin tihdikloh an nei a nih chuan insiamthat dan zawn a nih tur thu a sawi a. Chanchin chhe lam chauh langsar lova he department in ram tana thil tha a tihte chu langsar se a duh thu sawiin tan la thar turin thawktute a fuih a ni.
Fisheries Act 2002 siamthat chungchang sawiin Minister chuan he Act siamthat hna hi a hmawr bawk mek a ni a, Assembly Session awm leh turah pass hman a nih a beisei thu leh dan thar siam a nih hnuah chuan department leh fish farmers te harsatna tawh thin tam tak sutkian a nih tur thu a sawi a. Minister hian kumin chhungin District tinah Fish mela neih tum niin Mizoram chhunga sangha dila ei zawngten an tharchhuahte mipui lei theih tura an pho chhuah dawn bakah fish farmer tithate hnenah lawmman pek an nih tur thu a sawi bawk. Mizoram sik leh sa chu engkim that duhna, dil sangha pawhin an ngeih em em a nih avangin vairam sangha dil enkawltute aia hlawk zawka tharchhuak thei tura tan lak a tul, a ti a. A enkawlna kawngah sawrkarin mithiam a rawihte rawn hreh lo tur leh Department in sangha enkawl dan manual a siamte hmang tangkai turin Dr.B.D.Chakma chuan fish farmers te a fuih a ni.
Fisheries Secretary Pu Thlamuana chuan Fisheries department a thawktute chu an hnaah tui tur leh, taima tur te, indaihlohna karah pawh mawhphurhna hlen tum theuh turin a fuih a. Sangha dil tanpuina leh department in a thlawna a sem chhuah thin thil hrang hrangah a dawngtu tur dik takin an dawng em tih leh, an hmang tangkai em tih an ngaihven tur a ni a. Tanpuina chauh ngaihvena a taka thawk silo te, hmasawnna leh hmalakna thar awm si lova tanpuina sum ngaihven em em te an awm thin avangin fimkhur a tul hle, a ti.
Fisheries Director Pu SP Singh pawhin thu sawiin central sawrkarin policy thar duangin sum a pek dan pawh a tidanglama, chumi mil chuan Mizoram pawh a inher rem a ngai, a ti a. Satellite kaltlangin dil nei leh nei lo te chiang takin an en thei tawh a, data leh report pawh uluk zawka pek a ngaih tawh tur thu leh sawrkar laipui atanga tanpuina sum kan dawnte a nihna tur dik takah tangkai taka hman a nih theihnan tan lak thar a tul thu a sawi a ni.
MFTSA Conference chawhma lam hi an President Pu Lalrochhara’n a kaihruai a. General Secretary Pi Zonuntluangi leh Finance Secretary Pu R.Lalramnghaka ten report an pe a. Chawhnu lamah rorelna hun hmangin an Vice President Pu C.Laldawngliana’n a kaihruai a ni.
