2567/2022-2023
Aizawl the 8th november 2022 : Fisheries Minister Pu K. Lalrinliana'n vawiin khan Sialsuk Joint YMA-te buatsaih ni hnih awh tur Sialsuk YMA Tuikhuaha Nghakuai Chiah Runpui chu a hawng.

Nghakuai Chiah Runpui hawnna inkhawm Sialsuk YMA Tuikhuah chawlhbuka buatsaihah khuallian Pu K. Lalrinliana chuan luidunga eizawngtute leh sangha vulhtuten hlawk zawka sangha an man leh Zoram mipuiten luidung nungcha hnianghnar taka kan hmuh theihnan sawrkarin hma a la thin a, Sialsuk Joint YMA ten sangha humhalh leh vulh punga hetiang ruahmanna an siam hi a lawmawm takzet a, hei hian sawrkar dan bawhchhe si lo leh sawrkar phal loh hmanrua tel lova hlawk leh hlimawm taka sangha leh luidung nungcha a man theih a ni tih a lan tir bakah mipuite min zirtirtu mi ngei se a duh thu a sawi a. Luidung nungchate Pathianin kan ei atana a ruat rualin kan intodelh theih nan sangha note la ei tham lohte hi kan zuah hram hram a pawimawh a ni a ti a. Sialsuk Joint YMA ten tuikhuah siama uluk taka sangha an vulh pung chu entawntlak a ni tih sawiin tuikhuah tihchangtlunna tur pawh sawrkarin a rang thei ang berin a ngaihtuah dawn tih a sawi a. Sialsuk Joint YMA ten a tula an hman atan sumfai a hlan nghal bawk a ni.

Bialtu MLA, Horticulture Development Board Vice-Chairman ni bawk Prof. F. Lalnunmawia pawhin Nghakuai Chiah Runpui buatsaih a ni chu lawmawm a tih thu sawiin a buaipuitute leh nghakuai chiahtute zawng zawng duhsakna a hlan a ni.

Vawiin hun hi Health & Family Welfare Board Vice-Chairman Dr ZR Thiamsanga, MLA, Fisheries Secretary Pu Laldawngliana, Fisheries Director Pu F. Vanlallawma, Fisheries Department officialte bakah CYMA, MAA hotuten an hmanpui a ni.

Nghakuai Chiah Runpui hi November ni 8 & 9, 2022 chhunga neih tur a ni a, chawhma dar 10:30 atanga tlai dar 4:00 thleng a chiah theih ang. Sialsuk YMA Tuikhuaha sanghate hi kum 2 chhung khawih loh an ni a, nghakuai chiah tum an tam avangin online a in register a theih tawh lova, a hmuna kal a in register chawp ngai tawh dawn a, registration fee hi Rs 100/- a ni. Nghakuai chiah man hi darkar chanve atan Rs 50/- a ni a, duh chen chen chiah theih niin darkar chanve tinah Rs 50/- chawi belh zel tur a ni. Nghakuaia sangha mantuten an sangha man hi an nei nghal zel dawn a, a hmuna ei nghal duh tan ruahmanna siam niin, hawn duh tan pawh vur chhawp a ni bawk. Nghakuai hi mahni ta hman theih niin a duh tan a hmunah mau a siam nghakuai a lei theih a, a chah atan mahni neih ang ang leh duh ang ang hman phal a ni.