2568/2022-2023
Aizawl the 8th November 2022 : Health and Family Welfare Minister Dr R Lalthangliana chuan vawiin khan MINECO tualzawlah PHE Department leh Central YMA tang kawp buatsaih Aizawl khawpui Faina Hnatlangpui chu a vailiam.
He flag off program puala inkhawm tawi buatsaih ah hian Minister Dr R Lalthangliana chuan PHE leh YMA thawhhohna ropui a tih thu a sawi a, kan thiltih apiangah hlawhtling tur chuan thinlung atanga lo chhuak veina tak tak kan neih a pawimawh a ni, a ti. Khawvel ram changkang zawka thalai ten hnam rilru an ngaih pawimawh zia sawiin, kan ram chhiat leh that ah keimahni theuh hian mawhphurhna kan nei a ni, a ti. Minister chuan faina piah lamah environment humhalh lamhawi tarlan tel a ni chu lawmawm a tih thu a sawi a, lui hnar thenfai pawimawhzia leh ramngaw humhalh a tul zia a sawi bawk. Faina chuan hriselna a keng tel a, hrisel tur chuan mahni a hun insiam a ngai a ni, Dr R Lalthangliana chuan a ti a. Ram hmangaihna chuan hriselna leh faina a keng tel tur a nih thu a sawi. Tlawmngai pawl mi zawng zawng huap YMA kan nei chu Mizote chakna hnar a nih thu sawiin, faina hnatlangpui chuan rah duhawm tak a neih theih nan duhsakna a hlan a ni.
Central YMA President Pu Lalngheta pawhin thu sawiin faina hnatlang pui a tum hnihna atana hman a ni chu lawmawm a tih thu sawiin tuihna humhalh kawngah PHED chu thawhpui nuam a tih thu a sawi a. Mahni in leh lo leh a chhehvel vawn fai a pawimawhzia sawiin, bawlhhlawh paih danah fimkhur tur te, kawng engkimah, a lang leh lang loah pawh fai leh thianghlim a pawimawhzia hre thar leh turin mipuite a chah a ni.
PHED leh Central YMA chuan Coordination Committee dinin Tuihna humhalh, Fai Ieh Thianghlim lamah thawhdunna hun rei tak atang tawh khan an lo nei tan tawh a, 'Kan rama tuihna humhalh leh a awmsa tih pun ' thupui a neiin kum 2012 khan thawhdunna thuthlung (MoU) an lo siam tawh a , he thawhdunna thuthlung hi 2017 ah pawh siam nawn leh a ni. He an hmalakna avang hian kum 2019 ah India ram khaw fai inelna Swach Survekshan Grameen ah hmarchhak bialah Mizoram chuan lawmman pakhatna dawng in 2022 ah pawh lawmman pahnihna a dawng leh a ni. He Committee vek hian kumin November 3 ah thukhawmin vawiina Health Minister in a vai liam tak faina hnatlangpui neih hi an lo rel tawh a. Fai leh thianghlimna kawnga mipui zirtirna runpui atan Faina Hnatlang neih hi rel niin Aizawl daifem leh ualau lai hmun ruk (6) thlan bikah Aizawl khawpui chhung Branch YMA te leh PHED thawktute nen Faina Hnatlang neih hi ruahman a ni.
He faina hnatlangpuiah hian Aizawl khawpui chhunga Branch YMA 108 thawk chhuak tura beisei an ni a, bawlhhlawh paih motor 407 sawmhnih pahnih (22) rawih a ni bawk. A huhoa hnatlanna tur hmun ruatte chu_______Aizawl helna kawng (Aizawl bypass road) Chite lei atanga Silaimual; Mualdungsei atangin PTC peng ; MINECO (Gate No 1 atanga Gate No. 2); Tlawng kawng (Mission Vengthlang atanga Dihmunzawl) ;Durtlang Leitan atanga Bawngkawn; Durtlang Leitan atanga Sihphir (Sakawrhmuituaitlang) te an ni.
He faina hnatlangpui Flag off program hi Central YMA General Secretary Prof Lalnuntluanga’n kaihruaiin PHED hotute leh Central YMA hruaitu dang ten an tawiawm a ni.
Attachment
- Loading attachment...
