2569/2022-2023

Khawzawl the 8th Nov, 2022: Khawzawl District chhunga 11th Agriculture Census neih tur atan vawiin chhun dar 12 khan Khawzawl DC Conference Hall-ah Economics and Statistics Department buatsaihin Field Work Phase-1 hawnna leh Field Functioneries-te tana training buatsaih a ni.

He hun hmanpuitu Khawzawl District Bawrhsap Pu C.C. Lalchhuangkima chuan Agricultural Census chu ram hmasawnna atan thil pawimawh a nih thu leh loneitute hmasawnna atana thil tangkai tak a nih tur thu a sawi a. Survey nei turte chu uluk taka an kalna hmun apiangah, engkim a nihna ang taka report thin turin leh uluk taka thil zawt chhuak thin turin a chah a. Census report dik hi sawrkar chuan ruahmanna siam leh hmasawnna kalpui nana  hman tangkai thin avangin leh thil diklo siamthat leh a harsat avangin fimkhur turin a fuih bawk a. Agricultural Census chu kum 5 dan a neih thin a nih thu tarlangin, tun kum 5 lo awm leh tur atana Mizoram sawrkar document pawimawh a nih dawn avangin Enumerator-te chu theihtawp chhuah turin a ngen nghal bawk a ni.

He hun hi Pu Lalthlamuana Fanai, District Research Officer, Champhai chuan a kaihruai a. Pu Vanlalfinga, Inspector of Statistics, DRO  Office, Aizawl-in kalkhawmte zirtirna a pe a. He hunah hian Pu Zothansanga, Inspector of Statistics, Khawzawl leh DRO Khawzawl Staff-te, Field Enumerator tur mi 20 te bakah Official dangte an tel a ni.

11th Agricultural Census (2021-2022) hi Phase 3 a kalpui tur a ni a. Covid-19 vangin hun engemawchen a khaihlak hnuah neih tan tur a ni dawn a. Zau zawka agricultural statistics lak nana hman tur a ni.