2570/2022-2023

Aizawl the 8th November 2022: Vawiin khan Palsang YMA Branch kum 70 'Platinum Jubilee' lawmna Palsang Playground-a neih chu Bialtu MLA, School Education Minister ni bawk Pu Lalchhandama Rate chuan khuallian niin a hmanpui.

School Education Minister chuan he jubilee lawmnaah hian thusawiin, kum 1952-a din Palsang Branch YMA chu a din kum atanga tun thlenga meimit loa nung taka a kal theihna chhan, YMA Branch hruaitute chu chhuanawm a tih thu a sawi a. Minister chuan YMA chu pawl thianghlim a nih thu leh a thil tumte hriat chian a pawimawh thu te, Mizo ram leh hnam min tipumkhattu, tanpui ngaite tanpui thintu a ni a ti. YMA 'VIP' chu țanpui ngai, mi chhumchhia leh pachhiate, harsatna tawk hrang hrangte hi an ni a ti a. Khawtlangin kawng hrang hranga a thlamuanpui ni thei zel turin Palsang YMA Branch te chu dushakna a hlan bawk.

Pu Lalchhandama Ralte chuan Palsang khuain a mamawh ber chu zirna hi a ni a ti a. Zirna chu mi hmantlak leh mipuitlinga min siamtu a ni tih sawiin zirna ngai pawimawh khua apiang chu khaw changkang leh ding chhuak tamna khua an ni thin a ti a. Chutiang ni thei tur chuan zirna hi ngaih pawimawh nasat leh zual a tul a ni tiin a fuih a ni.

Palsang Branch YMA Platinum Jubilee lungphun chu Pu Lalchhandama Ralte hian a hawng nghal a, hei bakah hian MLA fund atanga sak Palsang 'MHIP RUN' pawh a hawng nghal bawk.

Palsang Branch YMA Platinum Jubilee lawmnaah hian Pu H. C. Lalmalsawma, Member, Sinlung Hills Council pawhin thu a sawi bawk. Palsang Branch YMA Jubilee lawmnaah hian khawtlang mipuite leh YMA member te an kalkhawm tha hle a ni.