Vawiin khan Art & Culture Auditorium, Lungleiah Office of the District Fisheries Development Officer, Lunglei buatsaihin Lunglei District sangha khawitute tan ‘Fish Farmers Training’ neih a ni a. Fisheries Minister Pu K.Lalrinliana chuan khuallian niin a hmanpui. He hunah hian Pu Lawmawma Tochhawng, HPC Vice Chairman chu khualzahawm niin Aizawl North III AC bialtu MLA leh Veterinary & Fisheries Board Vice Chairman ni bawk Pu C.Lalmuanpuia leh Fisheries Department Secretary Pu Thlamuana te pawh an tel a ni.

Training hawnna inkhawm Pu F. Vanlallawma, Fisheries Department Director kaihhruaiah Minister chuan Sangha Dil siam leh tharchhuah kawnga Lunglei District hmalakna chu fakawm a tih thu sawiin hemi kawnga hmasawn zelna tura training buatsaih a ni chu lawmawm a tih thu a sawi a.

Kum tam tak Fisheries Department in Sangha a khawi hnuah pawh hnianghnar taka kan intodelh lo chu inen letna tham a ni a, hemi kawngah hian Sangha khawitute leh Sawrkar department tan ho a ngai takzet a ni, a ti a.  State dang leh ram dang atanga Sangha lo lut tam tak awm hian Sangha tharchhuah lama kan intodelh tawk lohzia lan tirin, sangha hetiang zat zawrh ani hian Sangha khawi chu eizawnna  tlak anih zia a tih lan thu a sawi a.  Sangha khawitu kalkhawmte chu sangha kham khawp kan tharchhuah theihna tura theihtawp chhuah tur leh an mamawh leh harsatna tawh ah te anmahni rin thu maia kal lova Department mithiamte rawn taima thin turin a chah a ni.

FCS&CA Department kaltlangin Mizoramin thla tin buhfai quintal nuai khat chuang ram pawn atanga kan lakluh thin thu sawiin Ei leh bar intodelh kawngah Mizoramin hmasawnna tur tam tak kan la nei a ni, a ti a. Ei leh bara kan intodelh theihna turin SEDP kaltlangin sawrkarin hma a lak tur thu leh kan ram thar Buhte ration a sem thei tura hmalak tum anih thu a sawi a. Sangha chi intodelh thei tura a note tharchhuah lama tan lak  a ngaih thu leh pawn lam atanga la lut lova hatchery tam zawk bun anih theihna tura ngaihtuahna sen a ngaih thu a sawi a. Kan ram siam ngei Sangha chaw kan hmang thei lo chu pawi a tih thu sawiin, hemi lam hawi a hmalak a tul dawn thu a sawi bawk. Tin, nungchate humhalh kawngah tan kan lak zel a tul thu a sawi bawk. Training chuan rah tha a chhuah ngei a rin thu sawiin Farmers kalkhawmte chu duhsakna a hlan a ni.

He huna khualzahawm Pu Lawmawma Tochhawng pawhin thu sawiin ‘Fish Farmers’ Training’ Lunglei District-ah Mizoram Fisheries Minister ngei  a rawn tel thei chu lawmawm a tih thu sawiin Mizoram chhimlam hmasawnna tura a thahnemngaihna leh ruahmanna tha tak tak a siam pui avangin a chungah lawmthu a sawi a. HPC Lunglei hnuaia hmalakna lo awm tawh thin leh kalpui zel dan tur tlangpui sawiin kuthnathawktute hmalak pui leh an dinhmun chawikan te, mi tuina leh an thiam thil hmanga eizawnna an hmuh theih nana ruahmanna siam pui te, thalai tam zawk mahni kutkawiha eizawnna (entreprenuership) kawnga hmalak pui te kalpui zel a nih tur thu a tarlang a. Tun dinhmunah Lunglei District chu artui leh iskut a intodelh theihnan Department-te leh kuthnathawktute nen hmalak mek a nih thu a sawi a. Kawng hrang hranga intodelh a ngaih pawimawh hmasak thu sawiin kan intodelh phawt chuan Indian economy a tlakhniam pawhin kan lo buai ve tawh dawnlo a ni, a ti.

He hunah hian Aizawl North III AC bialtu MLA leh Veterinary & Fisheries Board Vice Chairman ni bawk Pu C.Lalmuanpuia pawhin thu sawiin ei leh bara kan ram intodelh chu sawrkar flagship program SEDP thiltum pawimawh berte zing ami a ni, a ti a. Kan ram mamawh chi hrang hrang te hi SEDP atangin umzui an ni dawn a, peng hrang hrangah chak taka hna kan thawh theih nan Board sawm leh pali din niin Fisheries lama hma la tu turin Veterinary & Fishery Board pawh din a ni a, sangha dil lama hmasawnna hna te, kan lui neihsa atanga hmalakna te kan la kalpui zel dawn a ni, a ti.

Fisheries Department Secretary Pu Thlamuana pawhin thu sawiin kan lui te leh nungchate humhalhna kawnga nasa tan la tu leh hmahruaitu YMA te chungah lawmthu a sawi a. Fish Farmers Training a tel te chu an hlawkpui ngei theihna tura duhsakna hlanin kawng engkimah Department ngheng hnai tur leh an mamawhte thlen thin turin a sawm a ni.

Pu Zohmingthanga, DFDO Lungleiin lawmthu sawina hun a hmang a ni.

Vawiin training ah hian Lunglei District Fish Farmer thahnem tak telin Government Zobawk Fish Farm ah training hi practical-a neih a ni a. Resource person ah Pu Zohmingthanga, DFDO Lunglei, Pu George Lalnuntluanga, FEO leh PU H. Vanlalfamkima AFO te an ni.

Training hawnna program neih hnu hian Minister hian Legal Metrology Office leh Lunglei High Powered Committee Office te a tlawh a. Zanriah ei khamah Aizawl panin Lunglei an chhuahsan a ni.