Vawiin hi India ramin Danpui a neih tanna ni pawimawh tak a ni a. Mizoram pawh heni pual hian Vanapa Hall-ah a lawmna hun buatsaih a ni a. He hunah hian Pu P.S. Sreedharan Pillai, Governor chu khuallian a ni a. Pu T.J. Lalnuntluanga, Minister of State, Law & Judicial chu khualzahawm a ni thung a. He ni lawm tur hian Sawrkar mi pawimawhte, NGO hruaitute, zirlaite, Dan hremite, Politician te leh sawmbikte an rawn tel tha hle a ni.

Constitution Day puala thuchah sawiin Governor P.S. Sreedharan Pillai chuan India Danpui chu khawvela Dan bu sei ber pawl, Dan bu danglam bik leh pawimawh bik, Demecrocy inrelbawlna hnuaia Khawvela ram lianber dawttu chhunga cheng mipui te hnena thuneihna pumhlum petu a ni a. India Danpui chhungah hian India rama thuneihna tawp chu mipuite kutah a awm tih chiang takin a in ziak. Chuvangin India Danpui hnuaia inkaihruainate hi khua leh tui ten kan zawmin kan zah tur a ni a ti. India Constitution siamtute zingah khan India ram bung tina chengte aiawh theuh an tel avanginIndia khua leh tui zawng zawngte he Danpui siamnah hian kan tel vek a. India Danpui chhunga inziak leh a tum chiang takin Constitution thuhmahruai, The 'Preamble  of Indian Constitution' ah a in ziak tih a sawi a. India Danpui chhunga pawimawh ber pahnih chu Fundamental Rights - Khua leh tui te Chanvo, Dikna leh Zalenna leh Fundamental Duties - India khua leh tui kan nihna anga kan tih tur te a ni a ti.

India khua leh tui kan nihna angin Fundamental Rights kan hriata, kan pawm a, kan ngaihhlut a pawimawh tluk zetin Fundamental Duties hnuaia khua leh tui te mawhphurhna leh tihturte kan zawm a, kan dah pawimawh hi kan mawhphurna a ni a. India Danpui kan neih champha kan lawmna niah hian khua leh tui zawng zawng, a bikin mipui rawngbawla sawrkar hna thawk zawng zawngten thahnem ngai taka kan mawhphurhna te hlen hi kan tihtur a ni tih kan inhriatnawn tir leh a ni a ni. "Ram hmasawnna tura hnathawhna kawnga hmachhawn tur leh paltlang tur tam tak a awm tih kan hriat thar a tul a. Ram hmasawnna tur te, a chhunga cheng inpumkhatna kawngahte leh khua leh tuite chanvo dik tak pekchhuak kawngah te tan la thar leh i la. Vawiin ni pawimawh takah hian Siamthat, hnathawh that leh tih hmasawn hi kan zavaia mawhphurhna a ni tih kan hriatthar leh theuh a ngai a ni", a ti.

Thusawitu dang, Pu T.J. Lalnuntluanga, Minister of State, Law & Judicial chuan Constitution Day hman a ni chu lawmawm a tih thu sawiin he ni pawimawh takah hian Khua leh tui ten kan dikna, chanvo leh zalenna tha tak hman leh ngaihpawimawh kan hriat thar leh a ngai a ti. Kan Fundamental Rights kan ngaih pawimawh tluk zetin khua leh tui anga kan tihtur - Fundamental Duties te tha taka zawm hi kan dah pawimawh thar a ngai a. Fundamental Duties leh Mizo nunmawi inzirtirna te pawh chu thil inmil tak a ni a ti a. India Danpui chu Mizote tan a pawimawh zual bik tih sawiin Mizo hnam pasalthate leh India sawrkar inremna angin DanpuiMizo te pual liau liauin India Danpui Article 371G-ah ziak takin kan inrelbawl dan tur a in ziak a. India Danpui hnuaiah Mizote hi tha taka humhalh kan ni a ti.

Constitution of India hi India Ram a lo piantirh khan neih a ni lova. Member 299 awmna, Constituent Assembly in India Danpui siam hna hi a thawk a. India Danpui siam tur hian ni 165 chhungin Constituent Assembly chu vawi 11 a thukhawm hman a.  A remkhawm khawm leh siamrem hna thawk turin August 29, 1947 khan Drafting Committee, Dr. B.R. Ambekar, Father of the Constitution of India tia koh Chairman-na hnuaiah din a ni a. November 26, 1949 khan Constituent Assembly thutkhawmah lunrual takin pawm a ni a. January 26, 1950 khan India Danpui chu hman tan a lo  ni ta a ni. India Danpui chhungah hian Part 22-ah then a ni a, Article 395 a awm a, Schedule 12 leh appendices 5 awmin vawi 103 siamthat, siambelh leh tihdanglam(Amend) a ni tawh a ni.

Constitution Day lawmna puala inkhawm hi Pu Lalnunmawia Chuaungo, Chief Secretary chuan a kaihruai a.  A ni hian The Preamble of Constitution of India chhiarrualna hun a kaihruai nghak bawk a ni. Programme bul tannaah Constitution of India siam a nih dan Video Clip, I&PR in a siam chu thlirho hmasak a ni a. Constitution of India chungchang tawi fel takin Dr. H. Lalzuithangi, Associate Professor, Hranbana College hnen atangin ngaihthlak a ni leh a. Pu Ashish Kundra, Commissioner & Secretary, GAD in lawmthu sawiin programme a khar a ni.