Deputy Chief Minister Pu Tawnluia'n vawiin khan Mission Vengthlang ah cheng nuai 369.87 seng a sak Table Tennis Training Centre-cum-Basketball Court a hawng.

Khuallian Deputy Chief Minister Pu Tawnluia chuan  thusawiin Table Tennis Training Centre-cum-Basketball Court sak puitlin na tura hmalakna hrang hrang a hriatin veng chhung mipuite leh khawtlang hruaitute hmathlir a zau hle a ni a ti a. Khawpui hmasawnna leh changkanna turin UD&PA in kawng hrang hrangin hma a la a, hetiangah hian mipui leh khawtlang tawiawmna kan mamawh em em a, hun lo la kal tur thui taka thlir chunga hma kan lak tlan zel a pawimawh a ni a ti a. Thangtharte khawvel tihhmasawnna kawngah tan nasa taka lak a nih thu leh thalaite talent leh theihna haichhuak tura a bul tanna hmasa ber atan Mizoram State Games pawh buatsaih a nih dawn thu a sawi a, hei hian thalaite ah malsawmna a thlen ngei a beisei thu a sawi bawk. Training Centre thar chu dim leh uluk taka enkawl a, thangtharte tana chhenfakawm taka hmang tangkai ngei turin mipuite duhsakna a hlan a ni.

Sports Minister Pu Robert Romawia Royte pawhin thusawina hun hmangin thalaite hriselna hi India sawrkar leh Mizoram sawrkarin a ngaipawimawh em em a, zirlaite tan pawh infiamna sports discipline hrang hranga tel dan tur ruahmanna te pawh siam a ni dawn a ni a ti a.Hmasawn turin hnam in fit leh thalai in fit kan mamawh a ni tiin, hetiang atana thalaite tuaihriamna tur tha tak neih a ni ta chu lawmawm a tih thu a sawi a, a tihchangtlunna atana an mamawh a awm chuan a tih theih chin ah puih a inhuam thu a sawi bawk.

He Table Tennis Training Centre-cum-Basketball Court hi Ministry of DoNER hnuaia Non-Lapseable Central Pool of Resources (NLCPR) scheme atanga sak a ni a, implementing agency chu Urban Development & Poverty Alleviation Department, Government of Mizoram a ni. A satu hi T. Neihlaia, Class-I Contractor, Chanmari, Aizawl niin May ni 18, 2017 atanga sak hna hi tan a ni. Chhawng hnih a sak niin a chhawng hnuai hi 793.03 square metre a zau a ni a, Table Tennis Training Centre atana hman tur a ni a, Table Tennis Board 8 dah theih tura ruahman niin eirawngbawlna choka, dining hall, dormitory room, bathroom-cum-toilet 6, tuizem litre 2000 dawng pahnih dah a ni a. A chhawng chung zawk hi Basketball Court atana hman tur niin a zau zawng hi 901.38 square metre a ni a, mipa leh hmeichhia te tan rest room a hrang a siam niin tuizem litre 2000 dawng pahnih dah a ni bawk.

Human Resource Development Board Vice-Chairman Pu. L. Thangmawia MLA, Mizoram Youth Commission Chairman Dr.Vanlaltanpuia MLA, Horticulture Development Board Vice-Chairman Dr. F. Lalnunmawia MLA, bialtu MLA Pu VL Zaithanzama, Pu PC Lalhmingthanga, Mayor, AMC leh Pu Lalringliana Deputy Mayor, AMC bakah UD&PA officials ten he hun hi an hmanpui a, tlaiah ruai an kilho nghal a ni.

Vawiin Table Tennis Training Centre-cum-Basketball Court hawnna inkhawm hi Pu Joseph Lalramsanga, Director, UD&PA in a kaihruai a, Pu Laldinsanga Hnamte, Assistant Engineer, UD&PA in project technical report a pe a, Pu Israela, President, Mission Vengthlang Branch YMA in thusawina hun a hmang a, Pi C. Laltleipuii, Deputy Director, UD&PA in lawmthu sawina in hnu a khar a ni.