Fisheries Minister Pu K.Lalrinliana chuan vawiin khan kolasib DFDO Training Hall ah Sangha khawi/vulh a eizawngtu te tana training buatsaih chu Khuallian niin a hmanpui.

Khuallian chuan kalkhawm te chibai buk in training chuan Sangha tharchhuahna kawngah rah tha chhuah se a duh thu a tarlang a, Sangha a intodelh tur chuan sangha khawi/vulh chu awmze neia kalpui bakah luidung nungcha te humhalh na kawngah nasa taka tan lak a pawimawh thu a sawi bawk.

State dang bakah Ram dang (Foreign) atanga sangha lakluh chu Mizoram khaw hrang hrang bazarah hmuh tur a awm teuh a, chu chuan Sangha khawi/vulh chu eizawnna tlak a nihzia a tilang chiang hle a sangha market pawh a tha ani tih a tilang bawk a ti.

Minister chuan Sangha vulh/khawi na kawnga hlawkna tel tur chuan awmze nei taka kawng hrang hranga hmalak a ngaih thu sawiin Sangha chi siam/tharchhuah a ngai a, sangha khawi hma in dil ah leitha dah a ngai a, dil ko tlang/dil kam a sangha chaw tur chin te, sangha chaw pek that te bakah dila patek te thenfai peih a ngai ani a ti a, sangha chi dah/chhuah tur pawh thlan uluk a ngai ani tiin kut zungtang tiat lek lek sangkhat vel dah ai chuan inchi thum emaw inchi li bawr vel 50 dah a hlawk zawk thu tarlangin sangha chi supply tute’n sangha chi thalo an supply chuan Department hnenah sawi hrehlo turin kalkhawm te a chah bawk a ni.

Pu K.Lalrinliana chuan kan Hnam nunphunga bet kan ei leh bar duhzawng te chu Hnam dang lakah zahpui mai lovin kan ei duhzawngte chu a hriselna bakah mihring tana a thatna te zirchiangin khawvel hriatah pholang/thehlar thiam ila, Kan Rama hnim hnah awm tam takte hian kawng hrang hrangin tangkaina an nei thei a, chun’ng te chu zirchiang in hmang tangkai ila, ei leh bara intodelh kan tumna kawngah nasa takin tangkaina a neih a rin thu a tarlang bawk a ni.

He hun kaihruaitu Fisheries Department Director Pu C.Laldawngliana chuan Fisheries Directorate record an neih ah kum 2018-19 khan Mizoram ah Sangha dil nei mi 16,263 an awm a, Kolasib District ah Sangha Dil nei mi 2980 awm in Kolasib District hian Kum 2018-19 khan Sangha Metric Ton 1833.20 an tharchhuak tih a tarlang ani. Hemi bakah hian Kolasib DFDO Pi C.Lalparmawii chuan Mizoramin sangha chi nuai 205 vel a tharchhuah zinga nuai 114 (55.6%) chu Kolasib District tharchhuah a nih thu  a tarlang bawk.

Chawhnu lamah Pu F.Vanlallawma, Jt.Director kaihhruaina hnuaiah traning na hun hman a ni a, Pu K.Lalmalsawma FEO chuan sangha khawi dan zirtirna pe in Pu Lalengliana, AFO chuan  sangha dil enkawl dan chungchangah zirtirna a pe bawk a, kalkhawm sangha khawitu (fish farmer) te atangin zawhna leh chhanna hun hman bawk a ni.