Vawiin khan Champhai DC Conference Hall-ah ruihhlo ngaite a bik taka enkawltu tur Doctor neih anih theihna tur leh De-Addiction Centre hmunhmate tihchangtlun dan turte sawiho a meeting neih a ni a. He meeting District Bawrhsap Dr. Naveen Aggarwal hova neihah hian MJA Member-te leh NGO aiawhte an tel a ni.

Bawrhsap chuan Champhai chu ramri hrula awm anih avangin thalai tam tak ruihhlo ngai an awm thu leh heng miten nunphung pangai an zawh leh theihna tura enkawla chhawmdawl hna thawh chu thil tul tak a ni, a ti a. District thuneitute leh khawtlang mipuite inlungrual taka thawhho a ngaih thu a sawi a.   Ruihhlo leh a kaihhnawih ngawl veina chuan mi pakhat chauh niloin chhungkua, khawtlang leh ram thlenga nghawng thalo tak a thlen avangin  ram hmelma do kawngah thawhho a ngaih thu a sawi a ni.  

Meeting-ah hian Mizoram Management for De-Addiction-cum-Rehabilitation Centre (Alcoholic and Drugs Addict) Rules, 1993 chu zirchian niin, hemi dan hnuaiah De-Addiction Centre kalpui tura thil tulte leh Doctor hemi lama thiamna bik nei awm tur a  tih anih thute pawh tarlan a ni a. De-Addiction Centre awm mekte thuam that aniha tun aia changtlung zawka kalpui anih theihna tura hmalak dan turte leh hmunpui lama awm Doctor thiam Psychiatrist-te nena Telemedicine hmanga inrawn tawn anih theihna tura kawng dap chungchangte pawh sawiho ani bawk. District chhunga ruihhlo ngaite enkawl kawngah tanlak a ngaih tak zet thu tarlan a ni a, Doctor hetianga lam thiamna nei  training tura intirhchhuah anih theihna tura tulte sawiho niin, De-Addiction Centre-a awm ruihhlo ngaite damdawi thiamna hmanga enkawl dan training mumal tak India rama Medical College changtlung ber leh hemi lama hriat hlawh tak All India Institute of Medical Sciences (AIIMS), New Delhi-a neih theih dan kawng ngaihtuah chu thil pawimawh leh hlawkthlak tak tur anih thute sawiho a ni a.  He mi ruahmanna tihlawhtlin anih theihna tura thuneitute dawr kawngah pawh lungrual taka thawhho zel a tul thu meeting-ah hian tarlan a ni bawk.