No.4302/2021-2022
Aizawl the 17th March, 2022 : Former Legislators’ Association of Mizoram (FLAM) chuan vawiin nileng khan Assembly Conference Hall, Assembly House Annexe-ah General Body Meeting an nei a, General Body Meeting hi hun hnih-a then niin chawhma lamah an member thite sunna hun leh ‘Tuihna Humhalh’ chungchang zirhona an hmang a, chawhnu lamah rorel inkhawm neiin FLAM Office Bearers’ thar an thlang bawk a ni.

Chawhma lam inkhawm FLAM Vice-President Pu P. Lalupa kaihhruai inkhawmah hian General Body Meeting an neih hnuhnung ber 25.10.2019 leh vawiin inkara an member nunna chan mi 15 te sunna hun hman a ni a, heng an mi sunte hi :

1) Pu Lalthankunga
2) Pu C. Sangzuala
3) Pu Hiphei
4) Pu Rokamlova
5) Pu F. Lawmkima
6) Pu R.D. Sangkhuma
7) Pu K. Thangzuala
8) Pu P.C. Zoramsangliana
9) Pu Saitlawma
10) Pu C. Ramhluna
11) Pu Hrangthanga Colney
12) Pu K.M. Biaksailova
13) Pu F. Sapa
14) Pu J. Lawmzuala
15) Pi Tluangliani (Pu Vaivenga nupui), te an ni.

Chawhma inkhawmah hian Pu K. Sang Chhum, FLAM Treasurer leh Pu Rochhunga Ralte, FLAM General Secretary ten report an pe a, Er. Chawnghnuna, Director, WSSO, PHED hnen atangin “Tuihna Humhalh Chungchang” thusawi ngaihthlak a ni bawk.

Former Legislators’ Association of Mizoram (FLAM) hi kum 1994 October thla khan MLA hlui 29 kalkhawmin an din a ni a. Mipui thlan MDC, MLA, MP lo ni tawhte intelkhawmna pawl niin National Ex-MLA Council ah member a ni a. Tunah hian member 140 an awm mek a ni.