Former Legislators Association of Mizoram (FLAM) chuan vawiin khan State Legislative Assembly conference hall-ah ‘good governance’ tih thupui hmangin seminar an nei a. Mizoram Larsap, His Excellency Vakkom B.Purushothaman chu Khuallian a ni. Good governance nih phung sawifiahin Larsap chuan rorelna tha chuan sorkar inrelbawlna siam that mai aia zau a huam a ni, a ti a.

Good governance nihphung chu mitin huapzo, a tam ber lungrualna, thlei bik nei lo, langtlang, rorelna awmze nei leh chak, mipui mamawh chhangtu, mawh la ngam leh dan anga rorelna hi a ni, a ti a. Good governance chuan sorkar, legislature, judiciary bakah media, private leh corporate sector te, cooperative societies te, pawl hrang hrang, trade union leh NGO te pawh a huam tel vek a ni, a ti.

Larsap chuan rorelna tha nei turin hmathlir thui tak leh ruahmanna tha a pawimawh thu a tarlang a. State pum tana tha ber turin ram chhung hausakna fel taka enkawl leh hleih nei lova sem zai thiam a pawimawh, a ti a. Ram hmasawnna atan an ngaihtuahna seng a, an tha leh zung thawh tura mipui chawk phur thiam rorelna apiangin mipui tawiawm a hlawhin a dingchang dawn a ni, a ti bawk.

Larsap chuan Mizoram chu state te tak te ni mah se, ram hausakna a nei tha a. Rorelna tha chuan ram hausakna hai chhuakin ei leh bara ram dinhmun a siam tha ang, a ti a. Ram hmasawn nan Central sorkar sum chauh a tawk lo tih sawiin Larsap chuan ram chhungah sum hai chhuahna kawng dap thiam a tul thu a tarlang a. Hemi kawngah hian FLAM member te chu ngaihtuahna seng tur leh Mizoram-in rorelna tha a neih theih na tura theihtawp chhuah turin a sawm a ni.

Seminar hi chawhma hunah FLAM President Pu K.LRochama’n a kaihruai a. Seminar tanna thuhma a sawiah Pu Rochama chuan FLAM aiawhin Larsap hnenah a fapa thi an tawrhpuina a sawi lang a. Mizoram Presbyterian Synod Moderator Rev. Thangzauva’n Bible chhiar leh tawngtaiin hunserh a hmang a. Larsap hnena FLAM thilpek chu FLAM aiawhin Mizoram Chief Minister hmasa ber Pu Ch.Chhunga nupui Pi Rothangi’n a hlan a. Dr.Kenneth Chawngliana Vice President FLAM chuan chawhnu hunah seminar hi kaihruaiin Pu J.V.Nunchunga paper buatsaih Good Governance tih chu sawiho a ni.