Vawiin khan Chief Secretary Conference Hall-ah Federation of Mizoram Govt. Employees & Workers (FMGE&W) chuan Chief Secretary Pu Lalmalsawma, IAS thlahna hun an hmang.

Chief Secretary Pu Lalmalsawma chuan thu sawiin amah thlahna hun tha tak buatsaih a ni chu lawmawm a tih thu a sawi a. Hnathawhna chungchang sawiin sawrkar hnathawkte chu kan taihmak bakah thahnem kan ngai tlang a ni, a ti a. Hmasawnna tur erawh kan la nei a ni tiin chungte chu - neitu tak tak rilru pu chunga hnathawh leh  hna-ah kan rilru tun aia tam zawk pek a ni, a ti a. Kan hnathawhna reng rengah kan thawh chhan kan hriat a ngai a, hemi kan hriat loh chuan hah taka kan thawh pawhin kan hnathawh a hlawk tur angin a hlawk thin lo a ni tiin sawrkar hnathawkte a fuih a ni.

FMGE&W Senior Vice President Pu K. Lalsawmvela chuan thlahna thu a sawi a. Kan Chief Secretary hi hnathawhnaa mi inpe tak a ni tiin a service chhung hian dik tak leh thahnemngai takin hna a thawk thin a ni, a ti a. Mahni hnaa rinawmna kawngah a ngaihsanawm hle a ni, a ti a. Office timing vawn dik chungchangah pawh a entawntlak thu sawiin a hun taka thil ti thin a nih thu a sawi a. A kalna zel turah duhsakna a hlan bawk a ni.

Programme hi FMGE&W Senior Vice President Pu K. Lalsawmvela chuan a kaihruai a. FMGE&W General Secretary  Pu R. Lalrammawia chuan citation hlanna a nei bawk.

Chief Secretary Pu Lalmalsawma hi IAS 1983 batch  (AGMUT Cadre) a ni a. India ram hmun hrang hrangah a thawh hnuin November Ni 1, 2014 atang khan Chief Secretary a ni tan a. February Ni 28, 2018 hian a pension dawn a ni. Department pali -  Finance, Personnel and Administrative Reforms, Political & Cabinet leh Vigilance a enkawl mek a ni.