Vawiin chawhnu khan Chief Minister Pu Lal Thanhawla chuan Mualpui, Salem Vengah Commerce zirna atan bika Special Plan Assistance(SPA) sum Cheng Nuai Zathum senga  sak, Commerce Block, Government Aizawl College a hawng a. Hemi rual hian Higher & Technical Education Minister  Pu R.Romawia'n RUSA sum cheng Nuai sawmsarih senga sak , Aizawl College Commerce Block campus chhunga Cafetaria leh Students' Common Room a hawng bawk a ni.

Government Aizawl College Commerce Block hawngtu Chief Minister Pu Lal Thanhawla chuan thalaite, a bikin zirna insanga zirlaite chu hriselna kawngah te, eizawnna kawngah te, khawtlangnun siam that kawngah te, Zonunmawi chhawm nun kawngah te leh Mizo tawng chhe mek siam that leh humhalh kawngah mawhphurhna pawimawh bik an nei a ti. Vantlang leh mipuiten mi hlawhtlinga an ngaih te chu chhut chian in nu leh pa thuawih, mi hawihhawm leh aia upa te zahna chang hria an nih deuh vek thu a sawi a. Hlawhtlinna kawngkhar hawng tur in thupek tiam nei hmasa - nu leh pa thuawih  chu thil tih hmasak ngai a nih thu leh Mizo thalaite tan phei chuan Mizo nunmawia bet zawng zawngte zawm vek a ngai tel a ni a ti.

Chief Minister Pu Lal Thanhawla chuan college chu zirlaite tan an hmalam huna an eizawnna tur thiamna zirna hmun a ni tih chian a ngaih thu a sawi a. "College chhungah zirtirtuten politics an ken luh a thiang lo a; politics khelhna hmunah college hman a nih a piangin buaina lian tak tak a thlen thin bakah zirlai tam takte hmalam hun tihchhiatsak a nih phah thin a ni", a ti. India sawrkar leh Mizoram state sawrkar-ten Education an ngai pawimawh ve ve tih sawiin Mizoram sawrkar in a din, Mizoram Education Reform Commission rawtna te pawh state sawrkarin a sum neih leh theihna chinah Mizoram hmasawnna atan leh thalaite tana khawvel thar siamna hmanrua atan a hmangchho mek zel a ni a ti a. " Zirna insanga zirlaiten in hriatfo ka duh chu ambition neih a pawimawh zia hi a ni a. Tum nei lo a zir ringawt in hlawhtlinna a thlen thin lo a; tum a san phawt chuan thlen chin pawh a sang nge nge a ni. Tin, Mizoramah hnalatu lianber leh a dawttu chu sawrkar leh kohhrante an ni a. Hengah hian Mizoram thalai lehkhathiam, degree nei zawng zawng tan hna a awm vek dawn a. Self employment lam hawiin sawrkarin entrepreneur tam tak chher tura NEDP hnuaia Entrepreneur Development Scheme kan kalpui te hi bengkhawnna chang in hriat ka duhsak takzet che u a ni", a ti.

Chief Minister Pu Lal Thanhawla chuan zirna insanga zirlai zawng zawngte chu chhunglam leh pawnlam nun inulukna chunga Mizoram leh hnam tana an mawhphurnate inchhut nawn fo turin a chah a. "Hriselna dah pawimawh a, insiamthatna hun in neih lai a  ei leh in, zuk leh hmuam kawnga invawn thianghlim leh Mizoram hmabak in ni tih inhrechiang turin ka duh che u. Sawrkar hnasang Mizote ta anga kan ngaih thin IAS, IPS, Army Officers leh a dangah te hniam lam kan pannaah te, ei leh in kawnga kan inthlahdah avanga cancer hmunpui tih theih tura Mizoram awm mek te bakah Mizotawng dik tihchhiat mek siamthat kawngah te hian tuna thalai te bak siamtha thei in awm lo a ni", a ti.

Thusawitu dang, H&TE Minister Pu R. Romawia chuan hnam thang mek ten changkanna ringawt dah hmasa an hnamzia leh tawngte an thlahthlam a piang in hnam angin an boral thin a ti a. Zonunmawi vuat bet tlatin Mizo hnam zia leh tawng te humhalh chunga  tunlai hmasawnna leh changkanna  neih tuma midangte el a pawimawh a ti a. Hnam chimralna laka atan himna chu hnamdangte aia thluak leh thiamnaa chungnun zawk a ni a ti. Mizoram in Market Economy lam a hawi meka chumi atan chuan sawrkarin  eizawnna tinzawn college - commerce college, technical college leh thiamna chikhat khalhfal bikna college te din chhoh zel a mamawh a, tum pawh a tum a ni a ti.

Government Aizawl College(GAC) Commerce Block hawnna inkhawm hi College tualah neih a ni a. GAC Principal Pu Lalrinawma chu chairman niin he hunah hian PWD Chief Engineer Pu Lalmuankima Henry in Commerce Block sakdan a sawifiah a; RUSA ASPD Pu Thanglura'n Cafetaria leh Students' Common room sakdan a sawifiah bawka; GAC Vice Principal Pu H.Rosema'n  programme a khar a ni. GAC Commerce Block hawnnah hian Bialtu MLA Lt Col. ZS Zuala leh GAC Alumni hruaitu zinga mi  leh ZOHANDCO Chairman ni bawk Pu R.Vanlalvena te, GAC Principal lo ni tawhte, zirtirtu pension tawhte leh mi pawimawh tak tak te leh zirlaite an tel a ni.

SPA sum Rs 300,00,000/- senga sak Government Aizawl College(GAC) Commerce Block hi chhawng thum a ni a, a len zawng chu Sq.Metre 1049 a ni. Chhawng hnih a tihsan leh theih tura a ruhrel hi sak a ni a;tuna sakzawh tak chhungthum ah hian zirlai 60 zel thut lenna tur classroom 6, staff room, Library, Office, store room bakah Building chhunga awm tur room leh hmunhma chi hrang hrang siam a ni. RUSA sum Rs 70,00,000/- senga sak Cafetaria leh Students' Common room hi chhawng hnih a ni a, sq.Feet 547 a lian a ni. Achhungah Canteen vawikhat a mi 80 len theihna bakah vawikhat a mi 60 len theihna tur Common room with SU office te siam a ni.