858/2025-2026

Champhai, the 12th June, 2025: Vawiin chawhnu khan Champhai District Bawrhsap mawhphurhna la mektu, Pu K. Zorammuana, Addl. DC leh Pu CC Sakhawliana, DCSO Champhaite kaihhruaiin New Champhaiah  eirawngbawlna Gas sem chhuah tur endik a ni.

Addl. DC Champhai Pu K .Zorammuana chuan Gas Agency-te chu supply point-a gas an sem chhuah dawnin gas cylinder bukna tur (spring balance) keng ngei tura chahin, gas buk tling ngei chauh lak a nih theih nan gas bur lak turte chu buktir nachang hre thin turin mipuite a chah nghal bawk a ni.

DCSO Champhai Pu CC Sakhawliana chuan gas burte'n danin a bituk anga buk a tlin loh emaw, a rih tur anga a rih loh chuan kan hman tur ang zat kan hman theih loh thu leh, a bur tling nena inang reng pawisa kan pek tho avangin pawisa kan hloh then thin thu a sawi a. A buk tling ngeia lei chu mipuite chanvo a nih thu sawiin, Champhai District-ah LPG Home Delivery veng thenkhatah kalpui mek a nih thu leh veng tam zawka kalpui tura hmalak mek a nih thu a sawi bawk.

Vawiina New Champhaia eirawngbawlna Gas sem chhuah turte hi mipuite hnena semchhuah a ni hmain buk a tling ngei em tih finfiah nan, spring balance leh digital weighing machine hmangtea endik hmasak phawt a ni a; Gas buk tling lo man chhuah a awm lo a ni.

Eirawngbawlna Gas endikna-ah hian Legal Metrology leh Champhai District Consumer Union aiawhte pawh an tel a ni.