Primary atanga High School zirtirtu leh Hindi Teachers zawng zawng inzawmkhawmna pawl, Federation of Mizoram School Teachers (FMGST) chuan vawiin khan a vawi khatna atan Vanapa Hall-ah General Assembly an nei a. Education Minister Pu Lalsawta chu khuallian niin he hun hi a hmanpui a ni.

Pu Lalsawta chuan zirna avangin kum reilote ah Mizo hnam mawl tak ni thin kha India ramah pawh ziak leh chhiar thiam tamna ber pawl dinhmun kan hauh chhoh ta mai a, hetiang dinhmuna min dahtu zirna, kan hnam rohlu hi kan ngaihpawimawh loh chuan engmah lovah kan chhuak ang, a ti. Ziak leh chhiar thiam tam ringawt erawh a tawk lova, tun dinhmunah zirna siamtha tura pawimawh ber chu  naupang ten chhawrtlaka zirlai an thiamna tur ngaihtuah a tul a ni Minister chuan a ti. Mipuiin tha aiin tha ni a lang kan buaipui a, exam result neih that leh that lohah sikul kan teh a, thiamna tak tak naupang ten an zirchhuak em tih erawh kan buaipui lo.Chuvang chuan Education Reforms Commission ten a tha ni awma lang nilo, a tha an rawn chhawp chhuah te hi tihpuitlin kan tum a ni, Minister chuan a ti.Education hi Politics khelh nan hmang lovin, Mizoram dinchhuah nan i hmang tlang vek ang u tiin Pu Lalsawta hian Political Party dangte thawhhopuiah a sawm bawk.

Zirna hmel tidanglam tura thil thar an ngaihtuah thenkhat Education Minister hian a tarlang a. Chung zingah chuan Hindi, Mathematics  leh Vocational Studies zirdan thar te a tel. Hman tangkai theih tur zawnga Hindi zir tul tiin nakum atang chuan Devanagari script paih chuang lovin chi 4-in Hindi zirlai ziah an tum thu a tarlang a- pakhatnaah Devanagiri Script in, a pahnihnaah Mizo tawngin, a pathumnaah a lam dan tur Roman Script in, a palinaah saptawngin dah an tum thu Minister hian a sawi a. Zirlai naupang hmun 3 a thena hmun khat dawn laiin Mathematics-ah harsatna an tawk a, tam tak mu tan a tling tih an hmuh avangin Mathematics-a a pawimawh lairil lai paih si lova a kherkhiap lai kal kan deuhin, a pangngai, standard quality buatsaih an tum thu leh a thiam leh zuam ho te tan Advanced Mathematics buatsaih ve thung an tum thu a tarlang bawk. Tunlaiah Agriculture, Horticulture, Geology and Mining leh Field hrang hrangah hmasawnna hna thawh mek zel a ni a, hemi mil zela Mizo thalaiten thiamna an neih a tul avangin sorkar chuanVocational Education uar tul a ti a. Mizoram mai ni lo India ram pumah Vocational Studies hi ngaihpawimawh niin a ngaihtuahtu tur Central sorkarin Minister 12 telna Committee a din a, kan phak ang tawk theuhah hman tlak leh rawih tlaka inchher tul tiin pawl 9 atanga eizawnna mil zawng hawia zirna hi buatsaih tul an tih thu Minister hian a sawi bawk.

FMGST General Assembly-ah hian thupui 8 ngaituah niin sawiho a nih hnuah lungrual takin an passed vek a. Chungte chu Academic Session chu Central anga April to March inkarah sorkarin sawn ve rawh se tih te; Mizoram School Education Service Rules  leh Service sorkarin siam siam rawh se te; 2012 School tan atangin Primary School-ah Pre-School leh Class-V dah ni rawh se tih te; Central sorkarin zirtirtute half pay leave a pek hi Mizoram sorkarin min pe ve rawh se tih te; The Central Civil Service Revised Pay Rules, 2008 hi Mizoram sorkar hnathawk te tan hman ni rawh se tih te; Mizoram sorkarin School Education Department sum mamawh kum khat tla pe ve thin rawh se tih te leh Teachers Grade Scale mumal taka siam chungchang te a ni.

Inkhawm hi Vice President Pu Lalthlamuana’n kaihruaiin  President Pu Lalrammawia’n thu a sawi a. General Secretary Pu Lalroliana’n lawmthu sawiin inkhawm a khar a ni.