No.6596/2020-2021
Dated Champhai, the 19th November, 2020: Vawiin khan Mizoram Remote Sensing Application Centre (MIRSAC) buatsaihin Fostering Climate Resilient Upland Farming Systems In The NorthEast (FOCUS) Project kaltlanga Undivided Champhai district hnuaia thawktute pualin Geographic Information System (GIS) Data chungchang leh a hman dan inzirtirna I&PR Conference Hall, CHANEM-ah neih a ni. He hun hi Bawrhsap Pi Maria C.T Zuali, Chairman, FOCUS Project Champhai chuan a kaihruai a ni.
Pi Maria C.T Zuali chuan FOCUS Project hlawhtlin theihna tura rahbi pawimawh tak GIS Data chungchang inzirtirna hun MIRSAC in a buatsaih chu lawmawm a tih thu leh FOCUS Project hnuaia thawktute tana tunlai thiamna tangkai leh pawimawh tak inzirtirna chuan rah tha tak a chhuah a beisei thu a sawi a. Ei leh bar chu sum leh pai ang zawnga chhut tur anih loh thu sawiin, Loneituten tun aia hlawk zawka buh leh thlai an thar theihna tura thiamna pek chu hna bulpui bera kan neih a ngai a ni, a ti a. Project tha tak FOCUS hnuaia thawktute chu kuthnathawka eizawngtu leh hmun kilkhawr zawka awmte chawikanga tanpui theitu an ni tih inhre reng tura chahin, MIRSAC buatsaih GIS Data training chu ngaipawimawha a taka hmang tangkaitu nih tuma theihtawp chhuah turin a fuih a ni.
Pu George Lalthanngura, DAO & FOCUS District Project Manager Champhai pawhin thu sawiin, FOCUS Project Champhai chuan Champhai District thendarh anih hma khuate a la huam vek thu leh thawktu mi 72 an awm mek thu a sawi a. Circle 8; Champhai, Hnahlan, Khuangleng, Vaphai, Khawzawl, Khawhai, Kawlkulh leh Ngopa te an awm thu a tarlang bawk. Thawktute chu hlawh pek an nih chhan hre renga FOCUS Project Champhai tihlawhtlingtu nih tum theuh turin a chah nghal a ni.
Training hi hun hnihah then a ni a. Champhai District chhung Circle 4 a thawktute tan chawhma lamah training hi buatsaih niin, chawhnu lamah Khawzawl District chhung Circle 3 leh Saitual District chhung Circle 1 a thawktute tan buatsaih a ni.
Vawiin GIS Data hman dan inzirtirna hunah hian GIS Data chhawr tangkaia awlsam zawka FOCUS Project hnuaia thawktuten hna an thawh theihna tur Smartphone chu MIRSAC Senior Scientist Pu Robert Lalchhanhima Sailo chuan DAO & FOCUS District Project Manager Pu George Lalthanngura hnenah a hlan a, thawktute kutah semchhuah nghal a ni. MIRSAC a thawk mithiam bikte hnen atangin thupui hrang hrang kaltlangin zirtirna ngaihthlak a ni a. Pu Robert Lalchhanhima Sailo, Senior Scientist, MIRSAC chuan FOCUS Project hnuaia ram chinchang tarlanna ‘Land Cover Mapping under FOCUS Project’ tih leh ram leilung a zira thlai chin theih tur ‘Crop Suitability Analysis under FOCUS Project’ tih thupui hmangin zirtirna a pe a. Pu R.Lalfamkima, Scientist, MIRSAC chuan FOCUS Project hnuaia GIS Data hman dan zirtirna pein a takin a entir nghal a ni.
