No.6597/2020-2021

Mamit 19th November, 2020: Vawiin khan District Development Co-ordination & Monitoring Committee (DISHA) chu an Chairman Pu C.Lalrosanga, MP Lok Sabha hovin DC Conference Hall, Mamit-ah thutkhawm a ni a. Mamit District chhunga MLA pathum Pu Lalrintluanga Sailo, 2- Dampa, Er. H Lalzirliana, 3-Mamit leh Pu Lalrindika, Ralte, 1-Hachhek te meeting-ah hian an tel bawk.

Chairman Pu C.Lalrosanga, MP Lok Sabha, chuan DISHA meeting chu mipui te’n kan aiawha kan thlan MP, MLA-te leh Govt Officials te bakah khawtlang hruaitute inkara thawhhona tha a awm theihnana buatsaih a nih thu a sawi a. Sawrkar laipui atanga ram hmasawnna tura Scheme duante uluk taka vil leh enzui a nih theihnan meeting neih thin chu a pawimawh thu a sawi bawk. Ram hmasawnna tura Sawrkar laipui atanga Scheme lokalte a nihna ang taka mipui te’n hmasawnna an hmuh theihnana theihtawpa tha-a kalpui turin Department Officials te a chah bawk a ni.

Chairman chuan Department Officials-te chu harsatna leh mutan an neihte meeting-ah sawichhuak hrehlo turin a chah a, MGNREGS hnuaia Ni 100 inhlawhna chu Covid avanga mipui te’n harsatna kan tawh avangin Ni 30 inhlawhna siamsak belh turin Central RD Department-ah nawr mek a nih thu a sawi bawk.

Meeting-ah hian Sawrkar laipui atanga Mamit District tana hmasawnna hna hrang hrang thawhte leh hmachhawpte thlirho niin MGNREGS hnuaiah kum 2019- 2020 chhungin Mamit District chhunga khaw 99-a Job Card 21700 te tan, ni 100 in hlawhna siam sak an nih thu tarlan a ni a. Kumin kum kal mek 2020 - 2021 ah Ni 87 inhlawhna siam a nih tawh thu tarlan a ni bawk.  Hei bakah hian  Sawrkar laipui atanga lokal Scheme hrang hrang PMAY(G), DDUGKY, PMKSY, SBM(U) & HFA(U), JJM, SBM, NHM, SAMAGRA, MDM, IPDS, BADP, ICDS, NSAP, PMUY, PMEGP, PNGSY, MPLADS, DIGITAL INDIA, Soil Health Card, Telecom, National Highway hnuaia hmasawnna hna kal mekte leh hmachhawpte thlirho a ni a. Heng Scheme hrang hrang kaltlangna Department Officials-te hian an thlen chin bakah hmachhawp an neihte meeting-ah hian an tarlang a ni.

Vawiin meeting-ah hian Mamit District chu Aspirational District kan nih angin NITI Aayog-in min vil renga, District hmel lanna a nih avangin kumin kum kal mek chhung tal hi chu Sawrkar atanga hmasawnna hna te chak taka kalpui a nih theihnan leh District hnufual kan nihna atanga chawikan kan nih theihnana min ngaihsaka vohbik turin Sawrkar ngen nise tih a ni a. Aspirational District kan nihna atanga hmalakna leh mutan meeting-ah hian sawi lan niin tehfung hrang hrang hmanga tehna atanga lawmman a lakte chu hengte hi a ni. 

1.1st on Education Sector March-April, 2019 on ADP dashboard. 

2. 2nd Delta ranking on Nov, 2019. 

3. 4th Delta ranking on Jan, 2020.  

4. 2nd Delta ranking on July, 2020- ah te lawmman lak a nih thu tarlan a ni bawk.

Mamit District chhunga MLA pathumte pawhin an bial chhunga hmasawnna leh Sawrkar hmalakna duhkhawp loh laite leh chak taka hmalakna kalpuia harsatna chinfel a nih theih dan turte meeting-ah hian an sawi a. Dec, 25th 2020 hma ngeia Dampui hnuai kawng laih a tlang ngei theihnan hnathawktu Gayatri Company te chu ngawrh taka hnathawk tura tih an ni a, Mamit Bialtu MLA hnenah Progress report nitin pe thin tura tih an ni bawk.

Meeting-ah hian Dr Lalrozama, IAS Mamit District Bawrhsap bakah Department Officials, Tlawmngai pawl aiawh Sub. Hqrs YMA, MUP, MHIP leh Jt Village Council aiawhte an tel a ni.