No.6598/2020-2021

District Education Committee, Samagra Shiksha, Hnahthial chu an Chairman leh District bawrhsap ni bawk Pu Vanlalmawia kaihhruaiin a vawikhatna atan vawiin khan a Office Conference Hall-ah an thukhawm a, District Level Purchasing Board (DLPC) member siamrem niin District Project Office Hnahthial bul tanna tura pawisa mamawh estimate DPC in a pharh chu pawm a ni bawk

Meeting kaihruaitu Pu Vanlalmawia chuan Hnahthial District tih changtlunna kal zelah sorkar chuan tunhnai khan SDEO Hnahthial chu DEO leh DPC, Samagra charge la tura tih a nih thu sawiin "kawng hrang hrangah Sorkar department-te District anga inrelbawlna a kal chho zel hi a lawmawmin District hi a lian emaw a te emaw a nihna tur anga fel taka a kal hi thil tha a ni" tiin Education lamah pawh district level meeting neih a ni thei ta chuan hmasawnna nasa tak a thlen ngei a beisei thu leh Hnahthial chu Zirna kawngah tunhmain a lo hmingthat thin tawh thu sawiin "Zirna kawngah hian mitin in mawhphurhna kan nei theuh a, khawtlang mipuite tanrual a ngai a ni" a ti a. Zirlai zawng zawng chu Sorkar hna sang thawk tura beisei vek chi an nih loh thu leh an zirna chu eizawnna ngelnghet leh tha an neih theihna tura tanpuitu atan hman a pawimawh thu a sawi bawk a ni. 

He hunah hian Pu Micky Lalenkawla, DPC, Hnahthial District chuan Samagra Shiksha kalphung leh hmalakna hrang hrang bakah Education Development evaluation & Granding index te chu Power point hmangin a sawifiah a, Hnahthial District chhunga Zirna In leh an dihmun te a tarlang a. School Education Department hmalakna Mid Day Meal kalphung leh District Education Committee mawhphurhna te inhrilhhriatna leh sawihona neih nghal niin Meeting chuan Hnahthial District ti puitling zel tura sorkar hmalakna leh Department te tih changtlun zel a nih avangin Sorkar leh School Education Deptt chungah lawmthu an sawi a ni

Mizoram sorkar chuan tunhnai khan Hnahthial-ah District level Office pahnih - District Education Office leh Samagra Shiksha District Project Office chu dah tharin DEO leh District Project Co-ordinator charge la tur hian SDEO Hnahthial Pu Micky Lalenkawla chu a rawn ruat nghal a ni.