No.3416/2021-2022

Aizawl the 15th December, 2021: Fostering Climate Resilient Upland Farming System in the Northeast (FOCUS) project kaltlanga A.H & Vety. Department, Champhai District-in FOCUS Project first installment kaltlanga 'Mithun Shelter-Community Level and Water Supply Facility for Grazing Area’ tih hnuaia Sial in leh tuikhur ramhnuaia siamte chu vawiin khan Pu R.K. Nithanga, State Project Director, FOCUS Aizawl chuan hman theih turin a hawng.

Thusawiin Pu R.K. Nithanga chuan FOCUS Project chuan thingtlang loneitute leh ranvulhtute tihhmasawn kawngah theihtawp a chhuah mek zel thu leh an sum lakluh tipung tura hma a lak thu a sawi a. Sik leh sa inthlak danglam chak lutuk avanga nunphung danglam leh harsatna thleng thinte beihletna tinzawna project siam a nih thu a sawi bawk. A.H & Vety. Department leh Vaphai khuaa Sial vulhtute thahnemngaihna kaltlanga Sial vulh kawnga hmasawnna ruhrel duhawm tak siam chu tangkai taka hman a nih theihna tura duhsakna hlanin a hawng a ni.

He hun kaihruaitu Dr. B.Zonghinga, DVO Champhai chuan a kaihruai a. Pu Lalbiaksâwma, Secretary, Tanzo Sevulh Pawlhnen atangin report ngaihthlak a ni a. Pu Emmanuela Sailo, VCP Vaphai chuan thu a sawi bawk a. Pu Lalthantluanga, Chairman, Tanzo Sevulh Pawl in lawmthu sawiin hun a khar a ni.

Sial in leh tuipekna 'Mithun Shelter Community Level and Water Supply Facility for Grazing Area' tih project hi FOCUS hnuaia thawh niin sawrkar kum kalta khan DVO Champhai huam chin Champhai District chhunga khaw 8; Farkawn, Samthang, Vangchhia, Sazep, Lianpui, Khuangleng, Hnahlan leh Tualchengte bakah, Khawzawl District-a Vangtlang leh Saitual District-a Kawlbemahte hawn a lo ni tawh a. A thawhhnihna turin Champhai District-a khaw 5; North Khawbung, Khuangphah, Vapar, Ruantlang leh Vaphaiahte Sial in leh tuikhur hi siam a ni a. North Khawbung leh Vaphai amite hi hawn fel a ni ve leh a, khaw dang 3 a siamte pawh hawn mai theih tura peih vek tawh an ni bawk.

Se in zau zawng hi a dung feet 36 leh a vang feet 36 a ni a, Se tuikhur nen avaiin tha 149 senga siam a ni a. FOCUS Project First Installment sum cheng nuai thum singhnih sangli za leh sawmkua (Rs. 3,24,190 lakh) sen a ni.

A.H & Vety. Department Champhai chhinchhiah danin Vaphaiah hian Sial vulh chhungkua 20 awmin Sial 267 an vulh mek a ni.