No.3416/2021-2022

Aizawl, 15th December 2021: Parking House Support Scheme (PAHOSS) hnuaia Aizawl khawpui chhunga Parking House sak zawh 11 chu Chief Minister Pu Zoramthanga, Deputy Chief Minister Pu Tawnluia leh AMC Mayor Pu Lalrinenga Sailo ten an hawng.

Parking House hawn te hi an awmna veng azirin zone pathum - North zone, South zone leh West zone ah thenin, Chief Minister chuan North zone ah kalin, Deputy Chief Minister Pu Tawnluia chuan West Zone ah a kal a, AMC Mayor Pu Lalrinenga Sailo chuan South Zone-ah kalin heng zone theuha parking House te an hawng. Parking House-te a hmuna hawn zawh hian Hyve-Aizawl City Hall ah hawnna inkhawm buatsaih leh a ni.

He inkhawmah hian Chief Minister Pu Zoramthanga chuan PAHOSS beneficiary, parking house sa zo tawhte chungah lawmthu sawiin, PAHOSS scheme thiltum chu tihhlawhtlin zel a nih theih nan leh, khawpui hmasawnna ruhrel din tura hmalakna hrang hrangte tihlawhtling tura sawrkarin theihtawp a chhuah zel tur thu a sawi. Chief Minister chuan mimal, pawl leh ram hmasawn nan hmathlir tha neih a pawimawhzia sawiin, thil tha ngaihtuahchhuak tura mahni remhriatna hman thiam kawngah theihtawp chhuah a pawimawh thu a sawi a. Hmasawnna dangtu anga langte pawh hmasawnna atana tangkai a hman zawk dan zawn thiam a țul thu a sawi. Pu Zoramthanga chuan PAHOSS chu a la țangkai belh zel tur thu a sawi a ni.

Deputy Chief Minister chuan PAHOSS beneficiary ten tha taka an puitlin a, tangkai taka hmanzui a ni chu lawmawm a ti a. Hripui leng avanga beneficiary dangte hnena installment pek tur, la pek theihloh awm chu pawi a tih thu sawiin, hmabak awm ang angte zawh thuai a nih theih nan sawrkarin theihtawp a chhuah zel tur thu a sawi. Deputy CM chuan sawrkar atanga a thlawn in parking house sak tanpuina an dawn angin, beneficiary te chuan tha taka enkawl zui ve tur an nih thu sawiin, lirthei dahtute ngaihngam taka an awm theihna tura tha taka enkawl zui zel turin beneficiary te a chah a ni.

AMC Mayor Pu Lalrinenga Sailo chuan PAHOSS scheme rah tha a taka hmuh a ni zel chu lawmawm a ti a. Beneficiary te chuan kum sawm chhung tal parking house a hman ngei ngei tur tih a nih laiin, kum sawm ral hnu ah pawh hman zui zel an duh a rinawm thu a sawi. AMC kuta dah a lq nih tur chungchangah inkaihhruaina siam tawhte chu khauh taka kalpui a nih tur thu te a sawi tel a. Mayor chuan AMC in Aizawl khawpui tihhmasawnna atana hmalak leh ruahmanna hrang hrang a siam zingah bawlhhlawh sawngbawl dan ruahmanna thar siam anih tur thu a sawi lang bawk a ni.

Inkhawm hi UD&PA Director Pu H. Lianzela chuan kaihruaiin, beneficiary te aiawhin Pi K. Lalduhawmi, Republic Vengthlang chuan thu a sawi a. Pu HVL Zarzoenga, Jt. Director (P), chuan report pe in, Pu Chuauhnuna, Deputy Secretary, UD&PA Dept. chuan lawmthu sawiin hun a khar a ni.

Vawiina Parking House hawn takte hi a vaiin LMV 71 leh Two-wheeler 309 leh theihna niin cheng nuai 121 sanction a ni a. Chungte chu:

 

Parking House Support Scheme (PAHOSS) hi State Flagship Programme pawimawh tak niin he Scheme in a tum ber chu khawpui chhunga Traffic Jam nasa tak sutkian nana Parking space tam zawk siam a ni a. A bikin mimal leh pawl Parking House siamthei te hnena tanpuina pek a nih theih nana ruahman a ni. Sawrkarin kum 2019 tir lama hun reilote chhunga a duan a a ni a, February ni 6, 2019 khan Chief Minister chuan a hawng a ni.

PAHOSS hnuaiah hian Committee pahnih a awm a, chungte chu: - 
1) Parking House Committee: He Committee-ah hian Chief Minister chu Chairman niin a kaihhruaina hnuaiah hian Meeting vawi-5 neih a ni tawh.
2) Executive Committee on PAHOSS: He Committee Chairman chu Chief Secretary a ni a kaihhruaina hnuaiah hian  Meeting vawi-8 neih a ni tawh.
            Executive Committee ngaihtuah tura chhawpchhuah hmabak  mi 414 an awm mek a ni.

Scheme kalphung tlangpui:
1.         PAHOSS hnuaia Parking House chu a tlemberah LMV panga (5) emaw Two-wheeler paruk (6) emaw dah theihn a ni tur a ni a, a tam lamah erawh bituk a awm lo. 
2.         LMV pakhat (1) emaw Two-wheeler (6) emaw park theihna zelah Rs.1.00 lakh (Cheng nuai khat) zel tanpuina dawn theih a ni. 
3.         LMV 1 dahna tan 4.5mx2.5m leh Two-Wheeler pakhat tan 0.8mx2.5m a zau tura duan niin, PAHOSS tanpuina dawngtu te chuan kum 10 tal parking atan an hmang tur a ni.
4.         PAHOSS tanpuina pawisa hi vawithum (3) Installment a pekchhuah thin a ni a.  1st Installment-ah 40%, 2nd Installment-ah 30%  leh 3rd Installment-ah  30%.

Dilna (application) dawn tawh zawng zawng zat chu 1458 niin, heng atang hian Executive Committee chuan 402 a approve tawh a ni.

Tun dinhmunah hian 3rd leh Final installment dawng tawh zawng zawng hi mi 11 niin, scheme atanga inhnukdawk mi 27 an awm bawk.

PAHOSS hi Lunglei, Champhai leh Kolasib-ah te kalpui tura hmalak mek a ni.