North East Zone Cultural Centre (NEZCC), Dimapur leh Art & Culture Department tangkawpin a buatsaih, Folk Songs & Folk Music Festival chu vawiin khan Vanapa Hall-ah hman a ni.

He hun hi Pu C. Thatkunga, Secretary, Art & Culture chuan a hmanpui. Festival hawngtu Pu C. Thatkunga chuan hnam impumkhatna programme tha tak mai buatsaih a ni chu lawmawm a tih thu a sawi a. India ram hi hnam ziarang chi hrang hrang neite awm khawmna a ni a. Kan inpumkhat theihna tha ber pakhat chu kan culture theuh inhriat sak a, kan inpawm tawn hi a ni a. Kan culture hi kan nihna diktak inphochhuahna, keimahni min tizawhawmtu a nih angin, hnamdang bulah pawh kan nihna ngei kan pholang ngam tur a ni, Pu C. Thatkunga chuan a ti.

Pu Ngurbiaka, Director, Art & Culture Department chuan sawi hawnna hun hmangin, thil thar ringawtah emaw, thil hlui ringawtah hian mi kan lawm kim lova, tunlai khawvel changkang tawh takah pawh hian kan pipute nun ziarang kha kan chhawm nun zel a, a thamral mai tur kan ven a tul a ni a ti.

Folk Songs & Folk Music Festival-ah hian Mizoram chhunga Cultural Club hrang hrang leh zaithiam thahnem tak an tel a. He huna tel tur hian Assam atangin Barpeta Cultural Troupe an lo kal bawk a ni.