2700/2025-2026

Dated Aizawl, the 17th December, 2025: Vawiin khan Food, Civil Supplies & Consumer Affairs (FCS&CA) Minister Pu B. Lalchhanzova chuan Aizawl West Joint YMA HAll, Vaivakawnah Mizoram State Sports Council Golden Jubilee 29th AMKA State Karate Championship 2025-26 chu MSSC Golden Jubilee Meichher chhi alhin a hawng a ni.

29th AMKA State Karate Championship 2025-26 hawngtu Pu B.Lalchhanzova chuan thu sawiin, Karate zirlai naupangte chet vel dan atangin Karate chu mahni inthunun theihna (discipline) zirna tha tak a nih thu a sawi a. AMKA hruaitute inpekna chu ropui a tih thu leh naupangte enkawl a, Karate hmanga hmalam eng tak nei tura an kaihhruaina chu rawngbawlna ropui tak a ni tih a sawi a. Karate zirlai naupangte chu dam rei turin nun uluk a, ruihtheih thil laka insum turin a fuih a ni.

Khualzahawm Dr Lalhmuchhuaka, Mizoram State Sports Council Vice President pawhin thu sawiin, kum 2036-ah Olympic chu India-ah nghah tum a ni a, chuta Mizoram atanga Olympian nei ve thei turin coach-te’n training neiin hma an la mek a, Karate naupangte chu hlawhtlinna changa games hrang hranga lawmman dawng thei tura tan la zel turin a fuih a ni.

Hawnna inkhawm hi Pi R.Lalbiakdiki, Vice Chairman, Championship Organising Board-in kaihruaiin, Sensei Lalropuia Pautu, Secretary hnen atangin report ngaihthlak a ni a. All Mizoram Karate Association President Pu R. Zomawia pawhin thu sawiin, Demonstration hmuhnawm tak thlirho a ni.

29th AMKA State Karate Championship 2025-26 denchhen hian nimin khan Sensei Lalropuia Pautu, Referee Commission kaihhruaina hnuaiah 14th AMKA Referee & Judge Training Cum Examination neih a ni a, Referee & Judge pass thar pali an awm a ni.

Karate inelnaah hiam kum 5 hnuai lam atanga Senior thlengin Kata leh Kumite-ah mipa leh hmeichhiate tan inelna neih a ni dawn a. District hrang hranga karate zirna 17 atangin player 430 vel an tel thei a. Championship hi December ni 19, 2025 (Zirtawpni)-ah zawh a ni dawn a ni.