2699/2025-2026
Aizawl the 17th December, 2025 : Ni 9.12., 2025-a Coordination Committee on Traffic Management thukhawmin a rel angin, kumin Krismas leh Kum thar vuakvetah Aizawl khawpui chhunga mipui; kea bazar kalte him zawk nan December ni 23, 24, leh 31-ah te hian “No Vehicle Day” hman tur a ni a, a hnuaia mi ang hian No Vehicle Zone leh lirthei tlan dan tur ruahman a ni.
1. Chanmari leh Zodin Square inkarah zing dar 10:30 atanga tlai dar 4:30 chhungin lirthei eng mah (Thirsakawr leh Nawrlirh huamin) tlan phal a ni lo.
Hei hian Emergency duty bakah, natna avanga Damdawiin pante a huam lo vang.
2. Civil Hospital atanga lirthei chhuakte chu Civil Hospital Road atanga Bazar Bungkawn lama tlan thlain Saron Veng lamah kal tur a ni.
3. No Vehicle Zone-in a huam china Taxi Stand-te chu A.R Mandir ep parking area-ah sawn a ni.
4. Chanmari leh Zodin Square inkarah lirthei engmah ‘No Vehicle Day’ hman a nih lai chuan dah phal a ni lo.
5. No Vehicle Zone huam chhungah hian chhim leh hmar inkalpawhna kawngpui (main road) khar a nih dawn avangin a helna tura ruahman kawngpui dungah traffic jam avanga harsatna a thlen lohna’n bungrua leh lirthei engmah dah phal a ni lo. “No Vehicle Zone” hela lirthei tlan dan tur chu hetiang hi a ni:
A. Lirthei hmar lam pante’n Zodin Square an pel thei lovang, hetiang in:
- Tlak lamah: Temple Square atangin Vaivakawn lama kalin Chanmari West lama chhoh emaw Company Peng lama chhukin emaw hmar lam pan theih a ni.
- Chhuah lamah: Sikulpuikawn atanga Ramhlun road via Republic Veng- College Veng - Bethlehem Veng - Chhinga Veng - Electric Veng lamah kal theih a ni.
- Treasury Square atangin Electric Veng via Republic Veng - College Veng – Bethlehem Veng – Chhinga Veng lamah a kal theih ang.
- Tuithiang peng, Chhinga venga Pi Sapdengi In bul atangin chho zawngin tlan phal a ni lo.
B. Lirthei Chhim lam pante’n Chanmari Bus Stand leh Hrangbana College an pel thei lovang. Tin, Chanmari kawn atangin Lower Chanmari, Lower Zarkawt lamah kal phal a ni lova, a hnuaia tarlan kawngah te hian kal theih a ni.
(i) Chanmari Biakin atanga Vaivakawn Road via Kawipui, Chanmari West.
(ii) Bawngkawn atanga ITI Road via Ramhlun, Electric Veng etc.
(iii) Lirthei reng reng Bazar Bungkawnah chhuah chhoh phal a ni lova, Modern High School bulah kual thlain Saron Veng/Chhinga Veng lamah an let ang.
Tin, “No Vehicle Zone” helna kawngin a paltlang Local Council hruaituten traffic jam avanga mipuiin harsatna an tawh lohnan theihtawp min chhuahpuia kawngpui dunga lirthei leh bungrua dah hnawk a awm loh nan vengchhung information centre atanga min puanzar sak tura ngen leh beisei an ni.
C. Dropping leh pick up: A hnuaia kawng tarlanah te hian dropping leh pick-up tur ringawtin lirthei a lutin a chhuak thei ang:
(i) Hmar lamah: Chanmari Biakin helin hmar lamah an kual let leh ang.
(ii) Chhimlamah: Zodin atangin Canteen kualah, AR Mandir helin chhim lamah kual let tur a ni.
D. Parking Area:
(i) Hmar lamah:
a) Two Wheeler leh LMV tan High Field, Zarkawt ah parking ruahman a ni.
b) Two Wheeler tan a hnuaia tarlanah te hian parking ruahman a ni.
i) Govt. Mizo Higher Secondary School, Commerce Department Gate bulah.
ii) Govt. Mizo High School compound leh Govt. Mizo High School Multi Level parking hnuai ber.
(ii) Chhim lamah: Two Wheeler tan a hnuaia tarlanah te hian parking ruahman a ni.
a) DC Office peng atanga SP, Aizawl Office peng inkar.
b) Dak Inpui leh Supply Department Office kawt.
Tin, Two Wheeler leh LMV tan a hnuaia tarlanah te hian parking ruahman a ni.
a) Aizawl South Treasury Office kawt.
b) Planning Office kawt.
c) City Park kawt kawngpui dungah.
F. No Parking: A hnuaia kawng tarlan ah te hian lirthei eng mah kawng dala dah phal a ni lo.
a) Temple to Vaivakawn road.
b) Vaivakawn Hunthar peng to Company peng leh Vaivakawn atanga Chanmari Traffic Point via Chanmari West.
c) Bawngkawn to Sikulpuikawn via Ramhlun North - Ramhlun South -Aizawl Venglai – Electric – Chhinga Veng – Saron Veng – Tuithiang Veng – Bethlehem Veng - College Veng - Republic Veng - Upper Republic/Treasury Square.
d) Armed Veng to Chhinga Veng Road; Pi Sapdengi In bul thleng.
e) Ramthar Sihpui to Chhinga Veng via Electric Veng.
Hei hian chhiatrupna thil; kangmei leh emergency pawimawh bika duty, dan leh thupek pawimawh bika Police leh Magistrate duty-te chetvelna a huam lo vang.
