2698/2025-2026

Aizawl the 17th December, 2025 : Mizoram Youth Commission chuan niminpiah December 15, 2025 (Thawhtanni) khan Hlawhtling takin MYC Read Fest 2025 chu Aijal Club Park ah an buatsaih. He Read Fest hi lehkhabu chhiar lam tui mite te leh Mizo thalaiten lehkha chhiar tam lama hmasawn theihna tur atana buatsaih a ni. Read Fest ah hian lehkhabu kaihhnawih intihhlimna chi hrang hrang buatsaih a ni a. Naupangte tan Lemziah (Painting) hmanga intihhlimna te leh infiamna hmun buatsaih sak an nih bakah an lehkhabu ngainat tak chhunga a changtute (Character) zulzui a inthuamna (Cosplay) intihsiakte buatsaih a ni.

He Fest-ah hian lehkhabu chi hrang hrang lei theih a phochhuah a nih bakah MYC Book Club member te tan Special Discount in lehkhabu te hi lei theihin phochhuah a ni bawk a ni. MYC Book Club member hi tu tan pawh nih theih a ni.

He hunah hian lehkhabu ziaktu larte nena inkawm hona hun (Meet the Author) neih a ni bawk a, Mizoram a ziaktu lar tak tak Pu Lalhruaitluanga Chawngte, Pu F. Vanlalrochana, Dr. Hannah Lalhlanpuii leh Ruth Khawlhring te chu kalkhawmte nen a inkawm hona neihpui an ni a, kalkhawmte’n hlawk thlak an ti hle. MYC Chairman Pu Malsawmzuala Ralte pawhin he hunah hian thusawiin, “Lehkhabu chhiar hian mihring hlutna a siam a, lehkhabu chiar tam chuan hun khirh leh harsa a tawh pawhin ngaihdan fing tak a siam zung zung thei thin a. Lehkhabu chhiar tam hi mihring hmantlak leh puitling a chhuahtu a ni” a ti a. Mizo thalaite chu lehkhabu chhiar uar deuh deuh turin a fuih bawk a ni.

He MYC Read Fest hi  thalai lehkhabu ngaina tak tak leh thu leh hla lama tuimite’n an ngai hlu hle a. Chumai bakah mizo ni lo hnam dang leh state pawn atangin pawhin chhimtu an awm nual a, he fest tlawhtu te hian hetiang Read Fest MYC in buatsaih nachang an hria hi lawmawm an tih thu an sawi bawk a ni.