2697/2025-2026

Saitual, the 16th December, 2025: Mizoram Co-operative Apex Bank, Keifang branch chuan kum tina an lo tih thin angin vawiin khan Christmas pual Charity programme an hmang a, Saitual District huam chhunga Home pahnih-Observation Home leh Serenity Boys Home te chu sum fai leh buhfai bag khat ve ve an pe a, Saihmar tlanga Sangtea memorial camping centre te chu buhfai bag, alu bag leh sumfai an pe bawk a ni. 

Vawiin inkhawmah hian MCAB Keifang branch te chuan an customer tha zual te leh Keifang VC pathum- Keifang leitan VC, Keifang Venglai VC leh Keifang Venghlun VC te chu Christmas chibai bukna thilpek an pe bawk a ni. 

Apex Branch manager Pi Lalrempuii Varte chuan an customer tha te chungah lawmthu a sawi a, VC te nen thawhhona tha tak an neih zel a beisei thu a sawi bawk. Vawiin inkhawmah hian Pu Lalrosiama District Co-operative Union Chairman pawhin thu a sawi a, Apex Bank-in hma a sawn thu te, kumtin mipui tana luan chhuah programme an nei thei te chu lawmawm a tih thu a sawi a ni.