2696/2025-2026

Saitual, the 16th December, 2024: Vawiin khan RD Minister Prof. Lalnilawma, Tawi bialtu MLA ni bawk chuan Mizorama a hmasa ber ni turin ni zung chakna hmang “Solar Market Shed” chu Seling leh Keifangah a hawng a, Saitual Rubber chingtute hnenah an hnathawhnaa hman tur Solar light a pe bawk.

He hunah hian Prof. Lalnilawma chuan thu a sawi a, SELCO Foundation leh MLA fund hmanga Solar project tihpuitlin a ni thei chu lawmawm a tih thu sawiin, sawrkarin khawtlang tan leh kuthnathawktu te tana tangkai tur ni zung hmang, project tluan tling, siam chhuah kawngah theih tawp chhuaha hma lak zel an tum thu a sawi bawk. 

Minister chuan chawhmeh zuar tute chuan ni zung chakna hmangin chhunah inchhem daih nan fan an hman theih bakah zanah eng an chhi thei tawh dawn tih a sawi a, bazarah zan rei tak tak thleng an thut theih tawh dawn avangin an eizawnna kawngah pawh hma an sawn phah a beisei thu a sawi.

Prof. Lalnilawma chuan ⁠Saitual Rubber Producer Society te pawh an Solar light chuan an hnathawhna lamah nasa taka a puih mai bakah, rubber thar chhuah kawngah pawh hma an sawn ngei a beisei thu a sawi a, heng Solar light te hi dimdawi tak leh uluk taka enkawl tur leh tangkai taka an hmang turin a chah nghal a ni.

Seling bazar-a Solar lighting project hawnnaah hian Minister chu Pi Malsawmhriatzuali, BDO Thingsulthliahin tawiawmin, SELCO Foundation-a thawk tute, Seling khawtlang hruaitute, NGOs leh Bazar nu ho an tel a ni. 

Saitual leh Keifanga Solar lighting project hawnna ah hian Prof.Lalnilawma hi Pu Lallawmawma Addl. DC, Pu V. Laldinsanga Project Director, DRDO ten an tawiawm mai bakah khawtlang hruaitute, NGO te, Saitual Rubber Producer Society te leh Bazar nuho te an tel a ni.