2695/2025-2026

Lunglei, 2025 Pawltlak thla ni 16: Lunglei Officers' Club (LOC) member-te'n Lunglei khawpui chhunga mi rethei leh khawsak harsate'n kum 2025 Krismas hlim taka an hman theih nana ṭanpuina tur sum an thawh khawm, Christmas Charity ₹ 2,20,000/- (cheng nuai hnih sing hnih) chu Lunglei khawpui chhunga chhungkaw 21 hnenah leh home leh institution thlan bikahte an sem chhuak.

Kum hmasa lama an lo tih ṭhin angin LOC member-te hian Christmas Charity atan sum thawh khawmin, cheng nuai 2.2 a tling khawm a. Hemi aṭang hian Lunglei Sub-Headquarters YMA kal tlanga Lunglei khawpui chhunga branch 21-a Branch YMA te'n ṭanpuina hlan tur chhungkaw khat ṭheuh an thlan chhuah angin kar hmasa khan LOC member-te'n Branch YMA hruaitute nen an inah kal chilhin ṭanpuina sum hi an hlan a. Vawiin khan Lungleia home leh institution thlan bik pali - Lunglei Home TNT, Bethel Centre, Rescue Centre leh Civil Hospital Lunglei Poor Patient Fund-ah te ṭanpuina sum fai bakah, a remchan dan angin dal, alu, nutrela, chini leh naupang lawm hmawmsawm chi hrang hrang an hlan leh bawk.

LOC hi December ni 18, 2023 khan din niin, kum 2023 Krismas vuakvetah khan mi harsate leh ṭanpui ngaite ṭanpui nan charity concert buatsaihin chhungkaw 21 hnenah ṭanpuina an lo hlan tawh a. Nikum 2024 Krismas vuakvetah khan member-te sum thawh khawm cheng nuai 1.5 chuang chu Lunglei Sub-Headquarters YMA kal tlangin chhungkaw khawsak harsate hnenah an lo hlan tawh bawk.