2175/2024-2025

Dated Aizawl: the 23rd September, 2024: Vawiin chawhma dar 11:00 a Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan (Grievance Redressal) chungchang inhrilhhriatna (Awareness Campaign), Vanapa Hall, Aizawla neih chu Pu B. Lalchhanzova, Hon'ble Minister, Food, Civil Supplies & Consumer Affairs chuan khuallian niin a hmanpui a. He hun puala buatsaih lehkhabute (booklet) a tlangzarh nghal bawk a ni.

Khuallian Pu B. Lalchhanzova chuan thu sawiin, tute pawh hi mahni zawn theuhah vantlang tana tangkaina nei thei vek kan nih thu leh chanvo pawimawh tak kan neih thu a sawi a. A bik takin retailer-te chu sawrkarin an tanghma a ngai em em tih hria a, mipuite tana thahnemngai lehzual turin a fuih a. Sawrkarin TPDS chungchanga hma a laknate kalkhawmte hmaah hian sawi zauvin, ration card var hmangte tana buhfai KG-a Rs 30 ni tawh tur chuan Mizona thinlung chawk thovin, rualkhai leh felfai zawka an kal phah ngei a rin thu a sawi bawk a. TPDS beneficiary-te thliar fel dan tur chungchangah pawh sawrkarin ngaihtuahna nasa tak a sen mek thu a tarlang bawk a ni.

Hun hman hi Pi Zodingpuii, Secretary to the Government of Mizoram, FCS&CA Deparment chuan kaihruaiin program neih chhan a sawifiah a.  TPDS beneficiaries puala buatsaih Lehkhabu te chu tlangzarh nghal a ni a. Hemi zawh hian Pi Saizikpuii, Director, FCS & CA chuan TPDS nihphung tlangpui presentation neiin, Pu Victor Lalawmpuia, Deputy Director (G), FCS&CA pawhin, One Nation One Ration Card (ONOCR) leh Grievance Redressal chungchangah presentation a nei nghal bawk a. Sawm bikte hnen atanga thusawi tawi ngaihthlak a nih hnuin, Panel Member-te nena sawihona hun hman a ni a. Pu Lalhmunsanga Hnamte, Addl. Secretary to the Govt. of Mizoram, FCS&CA Department-in lawmthu sawiin hun hman hi a khar a ni.

He hun, 'Awareness Campaign on TPDS beneficiaries' hi TPDS hnuaia beneficiary-te chanvo leh an harsatna chhawk zangkhai dan kawnga inhrilhhriatna a nih angin, Retailer leh Local Council-te puala buatsaih a ni a. Hei bakah hian NGO hrang hrang leh Community-based Organisations (CBOs) aiawh thahnem tak an rawn tel a. Kalkhawmte nena sawihona hlawkthlak tak nei turin a hnuaia mite hi he hun puala Panel Member-te chu an ni:

1. Pu B. Lalchhanzova, Hon’ble Minister of State, FCS&CA

2. Pi Zodingpuii, IAS, Secretary, FCS&CA

3. Pi Saizikpuii, Director, FCS&CA

4. Pu Victor Lalawmpuia, Dy. Director (G) & DCSO, Aizawl East