Indian Chamber of Commerce (ICC), Kolkata buatsaihin May ni 9 hian Mizoram Food Pro: Investors Meet I&PR Auditorium, Aizawlah neih tum a ni a. He hun hmang tur hian sorkar laipui a Food Processing Industries changtu Minister of State, Pu Harish Rawat chu lokal tura beisei a ni. Minister hi Food Processing Industries Union Secretary leh Joint Secretary bakah APEDA Chairman, NABARD Managing Director, NHB Managing Director leh Indian Chamber of Commerce hotuten an tawiawm ang a. Phai lama Bank leh Industry lian tak tak aiawh mi engemawzat he huna tel tur hian beisei an ni.
ICC in Mizoram sorkar thlawpna a ngen angin vawiin khan Industries Secretary Pu R.L. Rinawma IRS hovin a pisaah Agriculture, Horticulture, Industries, I&PR leh a kaihhnawih Department dang aiawhten meeting an nei a. Programme duan lawk thenkhatte thlir hovin Union Minister dawnsawn dan tur leh tluang taka he Investors Meet kalpui a nih theih na turin uluk taka thlirlawkna hun an hmang  a ni.

Mizorama thei leh thlai engemawzat kan tharchhuah serthlum te, balhla te, sapthei te, grape te, thingfanghma te, hatkora te, lakhuihthei te, thinghmarcha leh hmarchate te, sawhthing te leh thil dang dang hi thawnchhuah tlak khawpa  sawngbawl a, hlawk taka hralh chhuah a nih theih dan tur he Investors Meet ah hian thlirho a ni dawn a. Food Processing Industry lama tui mi ten he Meet hi tangkai taka an hman ngei beisei a ni.