Vawiin chawhma dar 10:30 khan Mara Autonomous District Council Day vawi 40-na chu District Playground Saiha-ah ropui taka lawm a ni. He ni lawmna inkhawm hi Pu K.H. Beihlo, Deputy Chairman, MADC Saiha chuan a kaihruai a Pu S. Khipo, Chief Executive Member chu khuallian a ni.

District Council Day hawnna hla Meisavaih MTP Branch ten an sak hnu ah Rev. Dr. T. Laikai, ECM chuan hunserh a hmang a, chumi hnu ah khuallian chuan thu sawiin District Council lo pian chhoh dan leh a thanchhoh zel dan te sawiin MADC day ropui taka hman a ni thei chu lawmawm a tih thu leh Pathian hruaina leh malsawmna a ni a ti a. Autonomous District Council hmang hian Central leh State sawrkar te chuan hnam te naute min chawikan a, hmasawnna kawng min zawhtir tumin theihtawp an chhuah mek a keini pawh sawrkar tawiawmin hmasawnna kawng kan zawhna ah hian rilru hmunkhat puin pheikhai rual taka ke pen theuh turin mipui kalkhawmte chu a chah a ni. He MADC Day ah hian District Council alo pian chhuah theih nana Mizoram sawrkar hnuaia hnathawk mahni hna lo bansan tawh tu mi 16 hnenah tangkafai Rs. 1,000/- theuh leh chawimawina certificate hlan an ni a, he chawimawina certificate dawngtu mi tam tak te chu an awm tawh lo a ni.

He ni lawmna ah hian hnam lam chi hrang hrang O dah lo, Awkhypala, Chawnglaizawn, Cheraw, MTP la, leh Sawlaikia te Cultural Troupe hrang hrang heng MCHP Headquarters Saiha, MTP Branch College veng, YLA Sub-Headquarters Saiha, Group 7 YMA Saiha, MTP Branch Saiha Vengpui, New Colony, MTP Branch leh ECM Veng MTP Branch ten an entir a ni. Programme karlah ah zaithiam hrang hrang zaite ngaihthlak a nih bakah Special Item hmuhnawm tak Don Bosco School Saiha naupang ten an entir a, lawmman hrang hrang  te sem zui anih hnuah Pu T.A. Chhohu, Executive Secretary, MADC chuan lawmthu sawina in he ni lawmna hi a khar a ni.