Vawiin khan sorkar laipuia Ministry of Food Processing Industries bul tumin North Eastern Regional Agricultural Marketing Corporation Ltd (NERAMAC) leh Mizoram sorkar Industries Department tangkawp chuan Food Processing chungchang inhrilhhriatna campaign I&PR Auditorium-ah a buatsaih a, Industries Minister Pu S Hiato chu khuallian niin khualzahawm atan Parliamentary Secretary, Industries Pu H Zothangliana hman a ni.
Awareness campaign hawngtu Pu S Hiato chuan ram pum huapin National Mission on Food Processing chu nikum April ni 1 atang khan tan a nih thu leh sorkar laipui hmalakna mah ni se State leh UT zawng zawnga hetiang lam tuimi te tana hamthatna tur programme hi Mizoramah pawh chak taka kalpui ve tan a ni, a ti. Industries Minister chuan Mizoram sorkarin hmachhawp lian berah a neih, NLUP hlawhtlinna a hmuh mek laia he programme lo piang chu thil lawmawm tak a ni tiin thlai leh thei tharchhuah lo pung zel turah te, sa leh bawnghnute bakah chaw hmeh chi hrang hrang thar chhuah pung tur riral mai lova sawngbawlna kawng leh vawn thatna tur programme lian tham tak hi Mizoramin a chhawr tangkai ngei a beisei thu a sawi. Minister chuan he sorkar laipui ruahmanna hi rampum huap anga kalpui a nih mek karah hian state hnufum leh industries lama bultan ve mek Mizoram ang te tan inmil remchang thei ber zawnga kalpui a tul tur thu te, loneitu leh thlai ching tute leh food processing lam mawhphurtute inkarah inhriatthiamna, thawh hona tha tak a tul dan tur te, Mizoram bikah chuan private company te beisei tur an awmloh avangin a ruangam dinna tur ruahman sak a tul bik dan te leh state pawn lam mi leh tualchhung mite inkara thawhdunna tha a pawimawh dan te a tarlang a ni.
Parliamentary Secretary Pu H Zothangliana chuan chaw leh thlai leh thei sawngbawl kawngah hian Mizoram sorkar chuan kawng tinrenga loneitute tanpui leh dawm kan a inpeih reng thu a sawi a ni.
Chawhnu lamah campaign hi technical session a hman zui niin Mizoram pawn leh chhung atanga mithiam thlanchhuah ten food processing lama thil hriat tur tangkai thil chi hrang hrang te, a hlawkna awm thei leh kalpui zel dan tur tlangpui an zirtir a ni.
