Mizoram sorkar-in Ministry of Youth Affairs & Sports programme Urban Sports Infrastructure Scheme hnuai atanga hmuh tura a beisei project pathum: 1) Laying of Synthetic Turf at Chhangphut Playfield, Champhai District,   2) Multipurpose Indoor Hall at Sazaikawn, Lunglei District     3) Multipurpose Hall at Lawngtlai District te chu Youth Affairs & Sports Minister Pu Jitendra Singh chuan tun atanga rei vak loah Mizoram pek a nih tur thu Mizoram Sports Minister Pu Zodintluanga a hrilh.

Sports Minister Pu Zodintluanga hi Conference of the State Ministers & Secretaries, 24th - 25th May, 2013 Vigyan Bhawan, New Delhi a neihah a tel a, sports hmasawnna tura Mizoram mamawh hrang hrang conference-ah hian a thlen. Pu Zodintluanga chuan Union Sports Minister Pu Jitendra Singh chu Mizoram-in Boys Hockey Academy, Kawnpuia astro turf phah zawh tak chu commission/inaugural programme-ah Chief Guest turin a sawm a, Pu Jitendra chuan North East zin thuai a tum a, chumi hunah chuan remchang a awm chuan a hman theih tur thu a hrilh.

State Ministers & Secretaries conference-ah hian MYAS chuan India ram pumpuia state hrang hrang district headquarters-ah District Sports School hawng turin programme a duang chhoh mek thu a sawi a. He school-ah hian hostel awm man, fee leh chaw man tur stipend a siam sak atangin a tumsak dawn a ni.

Pu Zodintluanga hi Sports Secretary Pu R Lalvena, IAS; Director Pu Lalzirmawia Chhangte, MCS; PS to Minister Pu Lalmuansanga, MCS; leh Mizoram State Sports Council Secretary Pu C. Laltlanthanga ten an tawiawm a ni.