Vawiin hian Pu C. Lalrinsanga, Minister, Agriculture, Irrigation & Water Resources, Cooperation, etc., chuan Chhiahtlanga Serchhip VDVK Aieng sawngbawlna thar leh Serchhip P&E Venga Assistant Register of Cooperative Societies (ARCS) Building thar hawnna a nei a. Building thar lawmna inkhawmah, Chief Minister ruahmannaa Food, Vegetable & Livestock Market Chain Management a ngheta kalpui thuai a nih tur thu a sawi.

ARCS Building thar lawmna inkhawm, DC Conference Hall a buatsaihah Minister chuan, Mizorama thlai leh sa thar chhuaktuten mumal leh nghet taka an thiltharte hralhna an neih reng theih nan leh an tharchhuah mamawh rengtu khawpuia cheng mipuiten awlsam taka kan ram thar chhuahte kan hmuh zung zung theih nan, Food, Vegetables & Livestock market chain management nghet, cooperative kalphung zul zuia, MAHFED leh MIZOFED te nena tang khawma kalpui turin Chief Minister zahawm tak Pu Zoramthanga chuan ruahmanna a siam a, reiloteah a taka kalpui a ni dawn a ni, a ti a. Serchhip kianga Mat phai zaute a fan tawh thu sawiin ram lailia hetiang hmun tha kan neih hi tunhma zawng aia nasa zawka thlai thar nana siamin Serchhip District atangin Economic eng chhit kan tum dawn a ni, a ti. Pu C. Lalrinsanga chuan, Mat phaiah hmun 31 ah tui verhchhuahna kalpui tura hmalak a nih thute, Mat lui chu solar pump a a sir tlang sanga pump chhohva, kum tluana thlai chingtuten tui hman tur an neih theih dan ngaihtuah a nih tur thute a tarlang a. Loneitute leh thilsiamna tenau ang chi zawng zawngte chu Cooperative Movement hmanga kalpui zel hi a ngialnghet tih sawiin thawh hona tha tak zarah kan ramin kan mamawh eitur tharchhuak turin kan bei zel dawn a ni, a ti. Minister hian Serchhip district ah hun rei tak ARCS building nei lova kan awm hnuin vawiinah building thar duhawm tak hawn a ni ta chu thil chhinchhiah tlak tak a ni, a ti a. ARCS Office hian district chhunga cooperative society zawng zawngte chu felfai takin a enkawlin, an hmasawnna tur project pawh a kalpui nual a, kuthnathawktute tan theih tawp an chhuah reng a ni, a ti.

Serchhip ARCS building thar chungchang techincal report Pi Diana Lalramthari, SDO, PWD, Building Division in a pe a. Building hi chhawng thum niin chhawngtin zau zawng hi 129sqm a ni a, sum Rs. 119. 69 Lakhs senga sak niin a satu hi Pu Zahnuna, Zemabawk Aizawl a ni.

Building thar lawmna inkhawm ah hian Serchhip Bawrhsap Pu Kumar Abhishek pawhin thusawiin, Serchhip ARCS in building thar mawi leh tha tak a nei ta chu lawmawm a tih thu a sawi a, district chhunga cooperative society hrang hrang te enkawl kawngah leh project hna an thawh chinah Serchhip ARCS chuan fak a phu tih a tarlang bawk.

Building thar lawmna inkhawm hi Pu Lalmuansanga Ralte, Addl. DC in a kaihruaia, Pu Lalrinsanga, MSCS, Registrar of Cooperative Societies chuan lawmthu sawiin hun a khar a ni.

Minister hian vawiina vek hian Chhiahtlanga Serchhip VDVK te tana Aieng sawngbawlna khawl thar hawnna a nei bawk a, Aieng ching tura thlan chhungkaw 10 te hnenah Aieng chi 30 quintals semna a neih nghal bawk. He Aieng sawngbawlna hmunah hian Aieng herna khawl leh a pack na khawl changkang tak dah a ni a, tin a thlang maiah hian Aieng chinna turin ram tin 5 a zau vah tawh niin hetah hian chhungkaw 10 ten a huhovin aieng an ching dawn a ni. 

Minister hi Aizawl atangin Dr. ZR Thiamsanga, MLA & Vice Chairman Mizoram Cooperative Development Council leh Pu TC Pachhunga Ex MLA & Vice Chairman Sports, Youth Affairs & Tourism Development Board leh Cooperation Department Official pawimawh ten an rawn tawiawm a ni.

Attachment

• Loading attachment...