Vawiin khan Mamit Playground-a Inter District Under 16 Football Championship 2011 tan niin Pu Lal Thanzara, Parliamentary Secretary to Chief Minister, President Mizoram Football Association nibawk chuan a hawng.

Hawnna inkhawm buatsaih, Pu P.C. Vanlalhruaia, Sr. Vice President, MFA kaihhruaiah thu sawiin khuallian chuan he champiohship hlawhtlinna tura hmalatu, official zawng zawngte bakah Pathian chungah lawmthu a sawi a. Football hi a thiam leh ti tak tak peihte tan chuan eizawnna tlak a ni a. Mizo tlangval pakhat phei chuan kum thum chhungin cheng vaibelchhe khat leh nuai sawm thum (1.3 crores) a hlawh dawn a ni a ti.

Football lama Mizote hmasawnna leh hmalakna te tarlangin Indian Junior Team, AFC Under -16 Qualifying Teheran a khelh mekah Turkanistan an hnehin Indian Captain, Mizo tlangval, Malsawmfela’n goal khat a khung nghe nghe a ni.

Celebrity Management Group (CMG) nen tangkawpin kum thar tirah N.E. Premier League hmarchhak state hrang hrang te, Home and Away a khel turin hma lak mek a nih thu a sawi a. Heng bakah hian MFA general body meeting in a lo rel tawh angin Foreign Coach, British mi Hugh Lewis chah chhuah niin District hrang hrang atanga Coach thlan chhuah mi 25 in November ni 5 thleng training an neih dawn thu a tarlang bawk a ni. Chumai nilovin December thla hian Inter Village U-17 Championship neih tura hmalak mek a nih thu leh hei hi talent search atan hman nghal tur anih thu khuallian chuan a sawi bawk.

Khuallian chuan Infiammite chu hlawhtling tura fuihin zuk leh hmuam a fihlim tur hian tan kan lak sauh sauh a tul thu sawiin hlawhtling tur chuan at chilh a ngai a ni a ti. Khuallian chuan infiammite chu infiammi rilru pu a, Yellow Card, Red Card hman ngai lo tura khel turin a chah bawk a ni.

Pu Rodala, MDFA Mamit in lawmthu sawiin District hrang hrang atanga lokal infiammite chu mahni khawtual anga khel turin a sawm a ni.

He MFA buatsaih, Inter District Under-16 Football Championship - 2011 ah hian Mizoram chhung District pariat(8) atangin player an tel thei a ni.

Chief Guest hian MFA in Inter District Championship thleng tute tana tanpuina a pek thin Rs. 70,000/- MDFA Mamit hnenah a hlan a ni.

Chief Guest hi MFA Officials thahnem takin Aizawl atangin an tawiawm a ni.