Mizoram tlawha lo zin Planning Commission Secretary Pi Suddha Pillai chuan vawiin chawhma khan Sihphir a tlawh a, NLUP tanpuina dawngtu loneitute thlai / thei chin dan te a hmunah a en a, harsatna an tawhte a sawipui. Pi Suddha Pillai hian Tlangnuam RD Block Sihphir-a MGNREGA hnuaia Bharat Nirman Rajeev Gandhi Sewa Kendra (BNRGSK) hmanga in sak, Mizo ten VC House kan tih thin, Rs 9,66,000 /- senga sak thar chu a hawng nghal bawk.

Inkhawmna tawite neih ah Pi Pillai chuan thusawiin Mizoram state mawi leh nuam tak a rawn tlawh thei chu lawmawm a tih thu a tarlang a. Inkalpawhna kawngpui te nei tha lo chunga mipui ten Sorkar hmalakna pui ber NLUP an tuipui zia chu ropui a tih thu a sawi lang bawk. Sorkar hmalakna hrang hrangte chu mipui chawikan nan leh tihhmasawn nan veka ruahman a ni a, tangkai taka lo chhawr chu mipui mawhphurhna a ni, a ti. NLUP chuan Mizoram sum leh pai dinhmun a chawi kang dawrh thei dawn a ni tiin tihhlawhtling tura theihtawp chhuah turin mipui te chu a chah a, Sorkar Laipui chuan NLUP hlawhtlinna chu beiseina sang tak nen a lo thlir thu a tarlang bawk. Ram chhung hmun danga naupang chaw tha hmu lo hmel dawldang Mizorama a hmuh loh avangin lawmthu a sawi a, state dangte tan entawntlak a ni, a ti. Nu leh Pa te chu naupang enkawl kawngah theihtawp chhuaha tan la zel turin a fuih a, lehkha zir taihmak te, hriselna leh thiamhlimna kawngah te leh thawhrimna kawngah te uluk taka naupang zirtira kaihruai thin turin a chah.  Hriselna hi Pathian thilpek a ni tiin khawtlangin chin tha lo kan neih thinte chuan hriselna a tichhe thin tih hriaa thangthar ten an rawn chin ve zel  loh nana uluk taka zirtir thin turin kalkhawmte chu a chah bawk.

Mizoram State Planning Board Member Secretary Pu P.L.Thanga pawhin thusawiin NLUP dawngtu ten thahnemngai tak leh rim taka an thawh hah man an hmuh let ngei theih nan, Iskut hralhna man hniam lutuk chu Planning Commission Secretary chuan a ngaihmawh thu sawiin Sorkar leh DC lam pawhin an lo enpui tur thu a sawi a. Planning Commission Secretary rawtna anga an hmalakna te leh hna thawh chin te chu thla laka, mi tam zawk leh a duh apiang en theih tura NLUP website (internet) ah dah tum a nih thu te a puang bawk. Kuthnathawktu ten harsatna an tawh apiangte chu an hnenah thlen zel turin a chah bawk.

Planning Commission Secretary Pi Pillaii hian Sihphira anthurium chinna hmunte a fang a. Delhi lama let thla turin Sihphir atang hian Lengpui airport a pan nghal a, Phunchawng daia SRI (rang zawk leh tam zawka buh thar dan) hmanga Pu C.Kapzela buh chinna hmun te a tlawh thla a, SRI hmanga buh chin hlawk dan leh tharchhuah a pun dante, leitha (fertilizer) an hman tangkai dan te an thlirho bawk.

Planning Commission Secretary hi Aizawl Deputy Commissioner leh department officials ten an tawiawm  a, Sihphir khawtlang hruaitu te leh Mizoram Iskut Growers Association hruaitute chuan Sorkar laipuia officer lianin an khua tlawha loneitute hnathawh dan a hmuna a rawn enfiah chu lawmthu an lo hrilh a, ngaihhruina thilpek Mizo thi leh an Iskut tharchhuah te Pi Pillaii hnenah hian an lo hlan a ni.