Nimin khan Consumer Affairs, Food & Public Distribution changtu Union Minister of State (Independent Charge), Pu K.V. Thomas chuan Mizoram Governor Pu Vakkom Purushothaman sawmna in Mizoram House, Vasant Vihar, New Delhi a tlawh. Minister hi Secretary, Ministry of Consumer Affairs, Food & Public Distribution leh officer dang ten an tawiawm a, Governor pawh Food, Civil Supplies & Consumer Affairs Minister Pu H. Rohluna, Secretary,  Food, Civil Supplies & Consumer Affairs Pi M. Zohmingthangi leh officer dangte, he hun hmang tura Aizawl atanga kal ten an tawiawm bawk.

Mizoram Governor leh Union Minister te hi boruak inpawh taka inkawmin Mizoramin ei leh bar hnianghnar tak kan neih theih nan sorkar laipui atanga tanpui a inhuam thu a sawi.

Pu K.V. Thomas, Union Minister chuan kumin kum tawp hmain Mizoram tan kum tina dawn thin pangngai bakah APL Rice Special Allocation 16000 MT pek theih anih tur thu a sawi a. He buhfai hi December hmaa lak anih chuan tuna rate aia tlawm zawkin Mizoram tan buhfai pek a ni ang tih tiam a ni bawk. Pu H. Rohluna, FCS&CA Minister in kumtina Mizoram tana Chini 666 MT pek thin 1000 MT a tipung tura a dilna pawh Union Minister chuan a phalsak nghal a, hei hi official level ah la chinfel zui tur a ni ang.

FCS & CA Minister leh Official dangte hi he meeting a thu dahte bawhzui turin New Delhi ah an chamzui rih ang.