Planning Commission-a Member Secretary Pi Suddha Pillai hovin nimin tlai dar 4.30 khan Aijal Club-ah Mizoram sawrkar hnuaia Department hrang hrang hotuten meeting an nei.
    
Pi Suddha Pillai lawmna thu sawiin Chief Secretary Pu Vanhela Pachuau chuan, “Pi Pillai-i hian Five Year Plan chungchangah leh kan programme hrang hrangah tunhma atangin min lo duhsak tawh thin a. Ama thahnemngaihna avangin tunah pawh NLUP atan cheng vaibelchhe 2000 chuang kan hmu thei a; hetiang taka duhsaktu kan nei hi Mizoram tan a hlu hle a ni” a ti.
    
Pi Suddha Pillai pawhin tawitea thu sawiin, “NLUP hi kan buaipui rei khawp a; a chhan chu kalphung leh inkaihhruaina mumal tak kan neih bawhpelh a duhsak che u in ngai a. Nimahsela, dan leh inkaihhruaina ai chuan mipuite hamthatna hi a pawimawh zawk nia kan hriat avangin NLUP pawisa hi ruahman theih a ni ta a ni. Keimah mai ni lovin, nangmahni duhsaktute chu nangmahniin tute nge an nih in hriat ka ring. He NLUP hmang hian tuna in hmasawnna kal mek bakah, 12th Plan-ah nasa zawka in than duan kan beisei a ni” a ti.

Pu P.L. Thanga, Member Secretary, Mizoram State Planning Board chuan power-point presentation hmangin Mizoram dinhmun tawifel takin a sawifiah a; Mizoram harsatna tawh mekte leh Planning Commission tanpuina mamawhna laite pawh chiang takin a tarlang a ni.

Hemi hnu hian Chief Secretary Pu Vanhela Pachuau kaihhruaina hnuaiah Department hrang hrang hotuten an harsatna leh sum lama tanpui an ngaihna lai te an sawi a; a bik takin NLUP hnuaia hmachhawp nei mek Department-te nen chinchang kimchang lehzualin an sawiho a ni