Vawiin khan Home Minister Pu R Lalzirliana’n New Secretariat Complex-ah Forensic Science Laboratory (FSL) Building sak thar a hawng.

Home Minister chuan FSL a thawktute chu an hnathawh pawimawhzia hria a fimkhur leh uluk taka hna thawk turin a chah a. Report diklo an pek palh chuan sualna neilovin thiamloh an chang thei a, thil tisualin hremna an pumpelh hlauh theih thung avangin thil tihsual palhin an hnathawhnaah hmun a chang tur a ni lo, a ti a. Mithiam tak tak, degree sang tak tak nei an nih angin an thiamna fimkhur taka hmang tur leh an thiamna chu taimaknaa chhunzawm turin Minister chuan a chah a ni. FSL chu Police te tha ti chaktu leh misual zawnchhuahna kawnga hna tangkai tak thawktu an ni a, rualkhai taka Police te nen thawhhona tha an neih chhunzawm zel a pawimawh a ti a, thawktute rinawm taka thawk tur leh midang te tana malsawmna nih chhunzawm zel tum turin Home Minister chuan a fuih a ni.

Cheng nuai 385.35 senga sak Forensic Science Laboratory Building hi 18.5.2007 khan sak tan niin 28.9.2012 ah sak zawh a ni a. Building hi 1788.95 sqm a zau a ni a. Zopa chhiara chhawng 5 niin room 28 a nei a ni. He building-ah hian tunlai thiamna changkang tak hman niin kawngka pui ber chu fingerprint hmang chauhva hawn theih a niin venhimna hmanrua changkang ber bera thuam a ni. Forensic Science Laboratory, Mizoram hi 1998 khan din a ni a. July 31, 2000 khan 3rd Bn MAP Complex, Mualpui-ah office neiin a din tirh hian Chemistry Division chauh a nei a. Tunah hian Division changtlung tak pasarih Chemistry, Ballistics &Toolmark, Questioned Document, Finger Print, Serology, Photography leh Toxicology Division te a nei a ni. Thawktu hi an vaiin 45 niin Joint Director in a ho a ni.

Vawiinah hian Parliamentary Secretary Home Pu Lalrinmawia Ralte, Home Secretary Pu K Riachho IAS bakah Police hotulian te an kim hle. Building hawnna inkhawm hi ADGP Mizoram Pu Amulya Patnaik IPS chuan a kaihruai a, DIG CID Pu LH Shanliana IPS chuan kal khawmte lawmna thu a sawi a, technical report PWD SE Er.Bowman chuan a pe a, DIG (Hqrs) Pu Saizela IPS chuan lawmthu sawiin inkhawm hi a tin a ni.