Muallungthu khua in an kum 100 tlin lawmna kal mekah vawiin khan khawtlang huapa awm ni khamin lungphun hawnna inkhawm an hman chu he khua atanga piang leh sei lian Mizoram Youth Commission Chairman Pu Hmingdailova Khiangte chuan a hmanpui.

Cheng nuai khat sing thum sang nga (Rs 135000) senga kum 100 tlin lungphun hi Muallungthu khaw hming chawina hmun mual pathum insuihfinnaah phun a ni a. Lungphun hawngtu Pu Hmingdailova chuan a seilenna khua in Central YMA lawmman dawng pha khawpa zu awm lohna khua dinhmun a chang ta chu a lawmpui thu leh khaw mipui te inlungruala sorkar hmasawnna ruahman hrang hrang tawiawm tlat turin a fuih a ni.

Muallungthu khua hi Sailo Lal Suakpuilala hmei fa Tulera’n kum 1912 a a din a ni a. Aizawl atanga chhimphei tlang dung lalili, 17 km a hlaa awm a ni a, kum 1912, vahsan lak lai atang khan mei mit lovin a awm tan a. World Bank Road in a tan tlang khaw nuam tak, sik leh sa thu ah pawh lu lutuk lo, vawt lutuk lo a ni. Zirna a mi hlawhtling hmasa te lo chhuahna khua a ni a, chung zingah chuan zofate zinga BE passed hmasa ber Pu Robula te, Pu Hmingdailova Khiangte IPS (Rtd), Pu Rotluanga MCS, Pu R Lalthanmawia SP te leh Pu RL Zalianthanga President District Council Court (Rtd) te hi a lar zual te chu an ni.

Muallungthu hi kum 2008, October ni 4 khan ruihhlo awm lohna (dry area) ah puan a lo ni tawh a ni.

2011 chhiarpuia a lan dan chuan in ding zat 267, chhungkaw awm zat 259, mipa 669, hmeichhia 609, mihring awm zat 1278, school awm zat 4 a ni.