Tukin zing 7:30 a.m. khan Transport Minister Pu P.C. Zoram Sangliana chuan Bawngkawn Traffic Point, Sairang Road-ah Fimkhurna Hapta vawi 32-na (27th November – 3rd December) chu a hawng. He Hapta hi kumtin Mizoram pumah Zoram Drivers’ Union (ZDU) in an huaihawt thin a ni.

Hapta hawna inkhawm tawite Pu V.L. Malsawmna, President ZDU Gen. Hqrs. Aizawl kaihhruai ah hian Pu P. C. Zoram Sangliana chuan lirthei khalh chungchanga himna hrang hrang inzirtirna hun Sawrkarin a buatsaih thin duhtawk mai lova, lirthei khalhtute ngeiin lirthei him zawka khalh dan inzirtirna an buatsaih chu lawmawm a tih thu a sawi a. Lirthei avangin nun a awlsam a, kan hahdam bawk a, lirthei avangin tam takin nunna kan chan ve reng bawk a, chuvangin lirthei enkawl danah kan fimkhur telloh chuan he hmasawnna duhawm tak hi chhiatna leh thihna thlentu a ni fo dawn a ni, a ti.

Transport Minister chuan lirthei khalhtute reng rengin mi nunna tam tak an kutah a awm a ni tih hriain, kawng hrang hrangah fimkhur leh zual turin a chah a. Motor khalh chhuah hma-a uluk taka motor khawl enfel turin, an tlanna kawng tur enfiah hmasa turin, motor khalh laia insumna tur thil hrang hrang – mobile phone hman, meizuk leh rilru la peng thei thil hrang hrang laka fihhlim turin a ngen a. Mizorama motor chetsualna 10 zela 6 zu vanga thleng a ni chu a zialo hle a ni tiin Minister chuan Mizorama lirthei khalhtu zawng zawng te tun aia nasa leh zuala insum a, zu in chunga motor khalh phei chu sim nghal turin a ngen bawk a ni.

Pu P. C. Zoram Sangliana chuan sawrkar lam pawhin lirthei chetsualna a lo tlem zawk theih nan nasa taka tan a lak mek thu sawiin Driving License pek chhuah kawngah fimkhur leh uluk zawka tih mek a nih thu te leh motor khalh chungchang, Traffic Signal hrang hrang inzirtirna leh fimkhur tura inzirtirna hun te chu uar tak leh zau takin buatsaih a ni thin a ti a. Minister hian lirthei chetsualna a lo tlem zawk theih nana sawrkarin dan chi hrang hrang a siamte zawm theuh turin lirthei neitute, lirthei khalhtute, a bikin hmeichhe lirthei ke pahnih nei khalh thin te leh lirthei a chuang thin te bakah lirthei kalna thin kawnga mipuite pawh, mahni zawn theuhah dan ngaipawimawha tan la theuh turin a ngen bawk a ni.

Fimkhurna Hapta hawnna inkhawm ah hian Transport Department leh Aizawl Traffic Police aiawhte bakah lirthei Association hrang hrang hruaitute an tel a ni.