Vawiin khan Art & Culture Minister Pu P. C. Zoram Sangliana chuan Khatla YMA Hall-ah Mizoram Chess Association (MCA) buatsaih P. S. Dahrawka Memorial Chess Tournament vawi 32-na chu a hawng.

Tournament hawnna inkhawm ah thusawiin Pu P. C. Zoram Sangliana chuan Pu P. S. Dahrawka chu Mizo zinga Ran-daktawr hmasa ber anih mai bakah Mizo zinga chess khel thiam hmasa ber a ni, a ti a. Pu P. S. Dahrawka nunah hian tumruhna leh mahni a inhaichhuahna chungchang zirtur thuk tak a awm bakah Mizo hnam inpumkhatna atan nasa takin a lo thawk thin a ni, a ti bawk. Mizo infiammi te chu Mizoram chhunga tournament chu duh tawk mai lovin ram pum leh khawvel huapa inelna ah te tel thei tura inbuatsaih turin a fuih a. Infiamna hi eizawnna tling a ni tih hre reng chunga hma la turin a chah bawk a ni.

Tournament hawnna inkhawm hi Pu Rochhunga Ralte, President (MCA) in kaihruaiin Pu P. Lalchhuanpuia, General Secretary chuan Report a pek bakah Pi Sangtei, Pu P. S. Dahrawka fanu naupang ber in a pa chanchin tawi a sawi bawk a ni.

P. S. Dahrawka Memorial Chess Tournament hi kum 1979 khan Pu P. S. Dahrawka nupui Pi Kaithuami’n a pasal hriatreng nan Mizoram Chess Trophy tiin a lo buatsaih tan a ni. Mizoram Chess Association hnuaia hian Affiliated Club 104 an awm meka, Mizoram a chess khelte zingah hian mi 10 vel chu rated players an ni.