Nu leh pa ten political party an atchilh anga atchilh lovin, hna thawk tha nia in hriat political party chu vote mai rawh u tiin Sports Minister Pu Zodintluanga chuan a sawi. He thu hi vawiin 27.12.2012 a Kolasib MLA Cup Football Tournament, Kolasib Diakkawna hawnnaah sawiin, Pu Zodintluanga chuan Kolasib District tlangval 20 rual ten India ram hmun hrang hrangah football chu eizawnna atan an hman mek thu a sawi a, thalaite chu an hnungzui tura fuihin theihtawp chhuah turin a chah.

Sorkar pawhin sports lama thalaite tuihalna hriain theihtawpin hma a la a, Kolasib Diakkawn Field hmuna Stadium puitling siam nan Vaibelchhia 26.82 project siamin central-ah thehluh a nih tawh thu a sawi a. Kolasib District chhungah Taekwondo Center siamna atan Vaibelchhia 14 Central-ah project siam mek anih thu leh chak taka bawhzui a ni a ti a. Heng te bakah hian Kolasib-ah Auditorium sak nan Vaibelchhia 24 man project siama thehluh a nih tawh thu a sawi bawk. Minister hian Diakkawn field pawh tun sorkarah inkhelhna tlaka cheithat a ni a ti a, pavillion atanga field panna tur step siamna tur pawh tun financial year chhunga pek an nih tur thu a sawi nghal a ni.

Pu Zodintluanga chuan Kolasib khawpui chhunga mirethei in 300 sak sak a ni chu lawmawm a tih thu sawiin Central leh Mizorama Congress sorkarin mirethei te a ngaihsakzia a lanna a ni a ti a. Politics tui nu avangin kan ramah hmasawnna a than tur angin a thang thei lo a, a siamthat hna hi thalai ten kan thawh a ngai a, kan ram hmasawnna tur chuan hnathawk tha vote mai turin a chah bawk.

Kolasib MLA Cup Football Tournament Kolasib District Football Association leh Kolasib Constituency MLA P.C. Zoramsangliana te buatsaihah hian Kolasib District chhung atangin team 43 lutin, Kolasib District chhunga football ngainatute hlut a hlawh hle a, jersey leh mawza Kolasib Bialtu MLA P.C. Zoramsangliana’n team tin te a thlawnin a pe a. He tournament-ah hian 1st Prize Rs.10000/- leh 2nd prize Rs.5000/- niin trophy a kengtel a, 12.12.2012 ah final match khelh hman tum a ni.

Attachment

  • Loading attachment...