Environment & Forests Department hnuaia Forest Protection Division chuan Mizoram chhunga ramngaw leh nungcha humhalh lamah nasa zawk leh khauh zawka hmalak zel an tum a, ramngaw (forest) enkawl hi mitin te tih makmawh a nih avangin mipuite tawiawmna an ngen a ni. ‘Forest’ tih hian a huam zau em em a, kan chhehvel - hnuailam, sirlam leh chunglam; khawih theih leh khawih theih loh, hmuh theih leh hmuh theih lo, hriat theih leh hriat theih loh; lei leh a chhunga rannung chi hrang hrang, thing leh mau, ramhnim, hruizam chi ; boruak te, ruah leh chhum, thli leh mei te hi a huam vek a ni.
Khawvelin a buaipui ber ‘global warming’ hi boruaka carbon dioxide tam lutuk vang a ni a. Hei hi a chhan chu hip raltu, tangkai taka hmangtu ramngaw thing leh mau te hi ram kang avangte, kalkawng leh in (industries) lo tam tak avang te, khelmual leh chenna hmun pung zel avang te, ram kang leh lo neih dan dik lo avang te in ramngaw a lo chereu a, carbondioxide eiraltu a lo tlem ta a ni.

Dr.J.V. Nunchunga, Economist, Aizawl-in a chhut danin Mizoram pumah kum khat chhungin mi 5000 kan thi a. Kuang atan thing phek 12,500 chumi hlut zawng chu cheng nuai 35 vel kan phum ral ang kan ni a, chumi atan chuan thingkung kum 50-80 vela upa 521 vel kit ziah ang kan ni a. Hei hian a entir chu boruaka carbon dioxide hip raltu tam tak bakah state rethei tan sum tam tak khawhral a ngai a, kan ramngaw a buai zo anga kan tuchhuan te tan ram chhia leh ruak kan hnutchhiah dawn a ni.

Kan chenna khawvel boruak siamtha a chenna tlak, hrisel nan leh changkang zel nan ramngaw siambelh zel hi a tihdan awmchhun a ni. Tuna a landan chuan ramngaw, thing leh mau phun belh zel chu sawi loh, kum 40-50 kal taa ramngaw tha kan neih ho te kha an riral zo tawh a, a la awm chhun chhe te te leh hmuh phak chin chin amite kan ru a, kan ti chereu zo a ni.

Chuvangin a hrethiam chin leh ram hmangaihtu tak tak tan chuan ramngaw siambelh leh venhim that te, phalna nei lova ru thin tute manchhuah leh thuneihtute hnena hlan chhawn leh report hi kan mawhphurhna vek a ni tih hre thar leh theuh turin Forest Protection Division chuan mipui zawng zawngte a ngen a ni.

Forest Protection Division Contact Nos.: 2325916 (O) / 9436140756 (M)