1725/2024-2025

Aizawl dated 24th August 2024: Vawiin chawhnu khan Pu Lalthansanga, Minister, Forest, Environment & Climate Change Department chuan Vengpui Welfare Committee, Falkland buatsaiha Vengpui Road siam thar hawnna hun chu khuallian niin a hmanpui a. Pu H. Zalawra, Chairman, Vengpui Welfare Committee chuan hun kaihruaiin Pu C. Lalrokhuma, Treasurer chuan report a pe.

Forest Minister Pu Lalthansanga chuan 'Falkland Vengpui Road' siam hlawhtlinna kawnga khawtlang hruaitute leh veng mipuite inpekna leh thawhrimna chu entawntlak a tih thu leh fakawm a tih thu a sawi a. Veng thang chak tak, pem lut tam tak awm mekna a nih angin khawtlang inkaihhruaina kawngah khawtlang hruaitute an fakawm a tih thu a sawi bawk a ni. Minister chuan Aizawl khawpui chhung ngeiah ram pass mumal awm lo, a luahtuten nakin zela harsatna an tawh loh nan, chinfel ngai thahnem tak a awm thu a sawi a. Hemi chungchangah hian Sawrkar chuan hma lak a tum thu a sawi. Pu Lalthansanga chuan hmasawnna hna chak zawk a kalpui tur chuan dikna leh rinawmna vawn nun a pawimawh thu a sawi a, hmasawnna hna hrang hrang kalpuina endiktu dik tak chu khawtlang mipuite an nih thu sawiin neitu nihna thinlungpu chungin hmalakna hrang hrangte chu vilpui thin turin kalkhawmte a chah a ni.

Report a tarlan danin Falkland Vengpui Road hi Falkland East lam pawh pheina tur kawng a ni a. Scheme for Financial Asistance to States for Capital Investment (SASCI) atang a cheng 480000 bawr vel leh khawtlang thawhkhawm cheng 477600 hmang a siam a ni a. Minister Pu Lalthansanga hian cheng nuai 1 a thawh ve bawk a ni. Vengpui Road siam thar hi Feet 460 a thui niin a zau zawng hi meter 4 a ni a, a chhah zawng hi inches 6 a ni. July ni 8, 2024 khan hna hi tan niin July ni 26, 2024 khan thawh zawh a ni.